Sansar News
काठमाडौं । संसद सचिवालयले बुधबारका लागि बोलाइएको संसद बैठकको सम्भावित कार्यसूची सार्वजनिक गरेको छ । संसद सचिवालयले बुधबार बस्ने संसद बैठकमा थारु आयोगको तेस्रो वार्षिक प्रतिवेदन र शोक प्रस्ताव मात्रैलाई सम्भावित कार्यसूचीमा राखेको छ ।
सरकारले एमसीसीसम्बन्धी प्रस्तावलाई टेबल गर्ने तयारी गरेको थियो । मंगलबार मात्रै प्रधानमन्त्री शेरबहादुुर देउवाले बुधबार बस्ने संसद बैठकमा एमसीसी सम्बन्धी प्रस्तावलाई टेबल गर्ने भन्दै कार्यसूचीमा समेट्न सभामुख अग्निप्रसाद सापकोटालाई आग्रह गरेका थिए । कांग्रेस संसदीय दलको बैठककै बीच उनले फोन संवाद गर्दै कार्यसूचीमा समेट्न भनेका थिए ।
तर, संसद सचिवालयले एमसीसीलाई नसमेटि सम्भावित कार्यसूची सार्वजनिक गरेको छ ।
संसद बैठकको कार्यसूची सम्भावित कार्यसूचीअनुसार नै हुने गरेको छ । तथापी कार्यव्यवस्था परामर्श समितिको बैठकले कार्यसूचीलाई हेरफेर गर्न सक्नेछ । बुधबार बिहान साढे ११ बजे सभामुखले कार्यव्यवस्था समितिको बैठक बोलाएका छन् ।
सभामुख सापकोटाले एमसीसीमा राष्ट्रिय सहमति गरिनुपर्ने धारणा राखिरहेका छन् । उनले विवादकै बीच एमसीसीलाई टेबल गर्न नसकिने बताउँदै आएका थिए । सम्भावित कार्यसूचीमा एमसीसी नसमेटिनुले पनि सभामुख असन्तुष्ट रहेको देखाउँछ ।
वि.सं.२०७८ फागुन ३ मंगलवार १७:५० मा प्रकाशित
