हामी सबैकाे संसारन्यूज

काठमाडौं । नेकपा (माओवादी केन्द्र)ं को संसदीय दलको बैठक बस्दैछ ।

बुधवार बिहान १० बजे बस्ने उक्त बैठकमा पछिल्लो राजनीतिक घटनाक्रम, संसदमा टेबुल हुने भनिएको एमसीसी लगायतका विषयमा छलफल हुने पार्टीको सचिवालयले जनाएको छ ।

बुधवार दिउँसो १ बजे बस्ने प्रतिनिधिसभाको बैठक अगावै माओवादी केन्द्रले संसदीय दलको बैठक बोलाएको हो ।

यसअघि नेपाली कांग्रेस र एमालेले समेत संसदीय दलको बैठक बोलाएर विभिन्न विषयमा छलफल तथा निर्णय गरेका छन् ।

नेकपा एमालेले सत्तारुढ गठबन्धनले प्रधानन्यायाधिश चोलेन्द्र शमशेर जबरामाथि महाभियोग ल्याएर स्थानीय निकायको निर्वाचन पछि धकेल्ने षडयन्त्र गरेको आरोप लगाउँदै त्यसको प्रतिवाद गर्ने निर्णय गरेको छ । साथै एमसीसीका विषयमा भने सत्तारुढ गठबन्धनभित्रकै दल स्पष्ट नभएकाले उनीहरुको एमसीसीबारे एउटै धारणा आएपछि मात्र आफुहरुले संसदमा पोजिसन दिने बताउँदै आएको छ ।

त्यसैगरी नेपाली कांग्रेसले केन्द्रीय कार्यकारिणी समिति र संसदीय दलको बैठकबाट एमसीसी तत्काल संसदमा टेबुल गर्नुपर्ने निर्णय गराएको छ । कांग्रेसको यस्तो निर्णयमा सत्तारुढ गठबन्धनभित्रकै ठूला दल माओवादी केन्द्र र एकिकृत समाजवादीले साथ नदिने बताउँदै आएका छन् ।

माओवादी केन्द्रले एमसीसी टेबुल हुँदा विरोध जनाउने बताउँदै आएको छ भने एमसीसीको विरुद्धमा पार्टीका जनवर्गिय संगठनहरुलाई बिरोधमा उत्रन निर्देशन दिइसकेको छ । उनीहरु बुधवार बिहानैदेखि नायाँबानेश्वरस्थित संसद भवन अगाडि बिरोधमा उत्रिइसकेका छन् ।