Sansar News
काठमाडौं । प्रतिनिधिसभाको बैठक आज दिउँसो १ बजे बस्ने भएको छ ।
बैठकको कार्यसूची तय गर्न सभामुख अग्नि सापकोटाले बिहान ११ बजे कार्यव्यवस्था परामर्श समितिको बैठक बोलाएका छन् । यद्यपी संसद सचिवालयद्धारा जारी आजको बैठकको सम्भावित कार्यसूचीमा राष्ट्रिय समावेशी आयोगको तेस्रो वाषिर्क प्रतिवेदन २०७७÷७८ राखिएको छ ।
यसअघिको प्रतिनिधिसभाको बैठकमा बहुचर्चित अमेरिकी सहयोग परियोजना एमसीसी टेवुल गर्ने भनिएपनि सत्तारुढ गठबन्धन दलभित्रै सहमति नजुटेपछि टेवुल हुनबाट रोकिएको छ ।
नेपाली कांग्रेसले प्रतिनिधिसभाको यसअघिका दुईवटा बैठकमा एमसीसी टेवुल गर्ने प्रयास गरेपनि नेकपा (माओवादी केन्द्र) र नेकपा (एकिकृत समाजवादी) पार्टीले संशोधन नगरी टेवुल गर्न नहुने अडान राख्दै आएका कारण टेवुल हुन सकेको छैन । यद्यपी नेपाली कांग्रेसले आजको बैठकमा एमसीसी टेवुल गर्ने बताएको छ ।
प्रतिनिधिसभाको बैठक अगावै आज बिहान १० बजे सत्तारुढ गठबन्धनको बैठक बसेर एमसीसी बारे निर्णायक छलफल गर्ने बताइएको छ ।
गत असार २८ गते सर्वोच्चको परमादेशसँगै नेपाली कांग्रेसका सभापति शेरबहादुर देउवाको नेतृत्वमा पाँचदलीय गठबन्धन सरकार बनेयता प्रमुख प्रतिपक्षी दलको भूमिकामा रहेको नेकपा एमालेले निरन्तर संसद अवरोध गर्दै आएको छ । एमालेको निरन्तरको संसद अवरोधका कारण प्रतिनिधिसभाको बैठक हालसम्म औपचारिकतामा मात्रै सिमित हुँदै आएको छ ।
वि.सं.२०७८ फागुन ८ आइतवार ०९:०४ मा प्रकाशित
