हामी सबैकाे संसारन्यूज

काठमाडौं । अमेरिकी सहयोग परियोजना एमसीसीको विषयमा सहमति जुटाउन सत्तारुढ गठबन्धन दलको बैठक आज पनि बस्दैछ ।

प्रधानमन्त्री निवास बालुवाटारमा आज बिहान १० बजे बस्ने उक्त बैठकमा एमसीसी परियोजना संसदमा टेवुल गर्ने कि नगर्ने भन्ने विषयमा निर्णय गर्ने बताइएको छ ।

एमसीसीका विषयमा निर्णायक छलफल गर्नका लागि यसअघि पटक–पटक बसेका गठबन्धनको बैठक निष्कर्ष विहिन हुँदै आएका छन् । यद्यपी शुक्रवार बसेको गठबन्धनको बैठक पश्चात सूचना तथा संचारमन्त्री ज्ञानेन्द्र बहादुर कार्कीले आइतवारको बैठक निर्णायक हुने दावी गरेका थिए ।

एमसीसी पारित गर्ने समय यहि फागुन १६ गतेसम्मको समयसीमा रहेकाले नेपाली कांग्रेसले यसलाई संसदबाट अनुमोदन गर्न ढिला भइसकेको भन्दै बुधवार र शुक्रवारको प्रतिनिधिसभाको बैठक एमसीसी टेबुल गर्ने प्रयास गर्दै आएको थियो । तर, पनि नेकपा (माओवादी केन्द्र) र नेकपा (एकिकृत समाजवादी) पार्टीले संशोधन नगरी टेवुल गर्न नहुने अडान राख्दै आएका कारण टेवुल हुन सकेको छैन ।