हामी सबैकाे संसारन्यूज

काठमाडौं । प्रधानमन्त्री शेरबहादुर देउवा र नेकपा एमालेका अध्यक्ष केपी शर्मा ओलीबीच बिहीबार साँझ भएको भेटमा अध्यक्ष ओलीले पुरानै अडान राखेका छन् ।

एमालेका अध्यक्ष ओलीले जुन कारणले आफुहरु संसदमा प्रवेश गर्न नसक्ने अवस्था आएको हो पहिले त्यसको निराकरण गर्न आवस्यक रहेको कुरा प्रधानमन्त्री देउवा समक्ष दोहोर्याएको सूचना तथा संचारमन्त्री ज्ञानेन्द्र बहादुर कार्कीले जानकारी दिएका छन् ।

‘केपी शर्मा ओलीले पुरानै कुरा राख्नु भएको छ । उहाँले भन्नु भएको छ, हामीले जुन कारणले संसदमा प्रवेश गर्न सकेका छैनौं त्यो कारण तपाइलाई पनि थाहा छ,’ संचारकर्मीसँग मन्त्री कार्कीले भने, ‘त्यो कारणको निराकरण नभइकन हामीले संसदमा आएर हाम्रा विचार राख्नलाई कठिनाई छ ।’

आइतवार संसदमा टेवुल भएको अमेरिकी सहयोग परियोजना संसदबाट अनुमोदन गराउनका लागि सत्ता सहयात्रीबीच सहमति जुट्न नसकेपछि प्रधानमन्त्रीले एमसीसीका विषयमा सघाउन भन्दै एमालेसँग निरन्तर संवाद र सहकार्य जारी राखेको छ भने एमालेले भने माधवकुमार नेपालसहितका १४ सांसदको पद खारेज वा सभामुख अग्निप्रसाद सापकोटाको राजिनामाको माग गर्दै आएको छ ।

आजको भेटमा पनि एमाले अध्यक्ष ओलीले सोहि कुरा दोहोर्याउँदै बैठकबाट बाहिरीएको बताइएको छ ।