हामी सबैकाे संसारन्यूज

काठमाडौं । प्रतिनिधिसभाको बैठक आज दिउँसो १ बजे बस्दै छ ।

आजको बैठकमा अमेरिकी सहयोग परियोजना एमसीसीका बारे छलफल हुने सम्भावित कार्यसूचीमा रहेको छ ।

एमसीसीलाई सम्भावित कार्यसूचीम राखेर बिहीबार बोलाइएको बैठक प्रधानमन्त्री शेरबहादुर देउवाले स्थगित गर्न गरेको आग्रहपछि सभामुख अग्नि सापकोटाले शुक्रवार दिउँसोलाई सारेका थिए ।

बिहीबार बसेको कार्य व्यवस्था परामर्श समितिले बैठकका लागि कार्यसूची तय समेत गरेको थियो । तर, अन्तिम समयमा प्रधानमन्त्रीको आग्रहमा सभामुखले बैठक स्थगित गरेका थिए ।

प्रधानमन्त्री देउवाले एमसीसीका विषयमा राजनीतिक दलहरुसँग सहमति नजुटिसकेको भन्दै बैठक स्थगित गरेर एमालेका अध्यक्ष केपी शर्मा ओलीसँग सहमतिका लागि पुनः छलफल गरेका थिए ।

त्यस्तै नेकपा माओवादी केन्द्रका अध्यक्ष पुष्पकमल दाहाल प्रचण्ड लगायतका नेताहरुले झण्डै एकवर्षपछि ओलीसँग भेट गरेका छन् । भेटमा एमालेले एमसीसीका बारेमा एमालेको निर्णय र राष्ट्रियहितका लागि एकजुट भएर जानुपर्ने छलफल गरिएको समेत बताइएको छ ।

बिहीबारको बैठकमा अर्थमन्त्री जनार्दन शर्माले एमसीसी सम्झौताबारे छलफल गरियोस् भन्ने प्रस्ताव पेश गर्ने रहेको थियो ।