हामी सबैकाे संसारन्यूज

काठमाडौं । रुस–युक्रेन द्धन्द्ध चर्किएको आज आठौंदिन । रुसले आकास र जमिन भएर युक्रेनका महत्वपूर्ण सहरहरु आफ्नो कब्जामा पारिसकेको छ । युद्धका कारण मंगलबार मध्यराति युक्रेनको सबैभन्दा ठूलो सहर खेर्सोन कब्जा गरेको समाचार सार्वजनिक भएको छ ।
सञ्चारमाध्यमका अनुसार रुसले अहिलेसम्म कब्जामा लिएको मध्ये खेर्सोन सबैभन्दा ठूलो सहर हो । सहर कब्जा लिएसँगै अहिले सडकहरूमा रुसी सैनिकहरू मात्रै देखिएको बीबीसीले जनाएको छ ।
यतिबेला युक्रेन रसिया युद्धमा मानवियता भन्दा पनि स्वाभिमान ठूलो बनेर आएको छ । देशका सयौं नागरिकले युद्धमा ज्यान गुमाइसक्दा पनि त्यहाँका राष्ट्रपति भ्लोदोमिर जेलनेस्कीले युक्रेन कुनै हालतमा पनि रुससँगै लडेरै छाड्ने घोषणा गरेका छन् । ४४ वर्षीय राष्ट्रपति जेलेनेस्की यतिबेला बंकरभित्र बसेर रुसविरुद्ध लडिरहेको समाचारहरु सार्वजनिक भएका छन् ।

युक्रेनले आफ्ना देशका १८ देखि ६० वर्ष उमेरका नागरिकलाई देश नछाड्न आग्रह गरेको छ भने देशका लागि लड्न भन्दै प्रत्येकको हातमा हतियार थमाइदिएको छ । धेरै नागरिकहरु यतिबेला युक्रेनी सेनामा भर्ना भइरहेका छन् । हालसम्म १० लाख बढी युक्रेनीले देश छाडेको बताइए पनि अधिकांशले देशलाई अप्ठेरो परेको बेलामा बरु मर्न तयार छौं भन्दै रसियन सेनासँगको लडाइमा उत्रिएका छन् ।

युक्रेनलाई विभिन्न देशले सहानुभुति जनाइरहेको र आवस्यक पर्ने सहयोग उपलब्ध गराउने समेत बताइरहेका छन् । नेपालको नजिकैको छिमेकी भारतले भने त्यहाका जनताका लागि औषधि लगायतका राहत सामग्री पठाउने बताएको छ भने चीन भने रुस न युक्रेन तटस्थ बसिरहेको छ । साथै अमेरिकी राष्ट्रपति जो बाइडेनले पनि रुसलाइ आर्थिक सहयोग पठाउने घोषणा गरिसकेका छन् ।

देशभक्तिमा भावुक बने युक्रेनी
रुसले युद्धमार्फत् युक्रेनी जनताको बाँच्न पाउने अधिकार हनन गरेको भन्दै धेरै देशमा रुसको विरोध भइरहेको छ । फ्रान्सको एक म्युजियममा रहेको रसियन राष्ट्रपति भ्लादिमीर पुटिनको स्टाचु हटाइएको छ ।

त्यस्तै युरोप अमेरिका, युके लगायतमा रहेका युक्रेनी नागरिक यतिबेला आफ्नो देशलाई सहयोग गर्न भन्दै ति देशबाट हजारौं माइल यात्रा गरेर युक्रेन फर्किदै छन् ।

बिबिसीका अनुसार युकेमा रहेका युक्रेनी नागरिकहरु यतिबेला रुसविरुद्ध युद्धमा सहभागी हुन स्वदेश फर्किने तयारीमा छन् । उनीहरु त्यसका लागि सैन्य उपकरण लगायतका समग्रीहरु जुटाएर देश फर्किन लागेका हुन् । उनीहरु २००० किलोमिटर लामो बाटो दूरी पार गरेर देश फर्किने तयारीमा छन् ।

बिबिसीका अनुसार उनीहरुले खाद्य सामग्री, फ्लाक ज्याकेट, हेल्मेट र औषधि उपचारका लागि आवस्यक सामग्री खरिद गरेको बताइएको छ ।

रसियाविरुद्ध यतिबेला युक्रेनका खेलाडी, गायक गायिका, मोडल, व्यवसायी लगायत हतियारसहित लडाइको मैदानमा उत्रिएका छन् ।