हामी सबैकाे संसारन्यूज

काठमाडौं । नेकपा (माओवादी केन्द्र) को केन्द्रीय समितिको बैठक आजदेखि बस्दैछ ।

माओवादी केन्द्रीय कार्यालयका सचिव श्रीराम ढकालका अनुसार राष्ट्रिय सभागृहमा बिहान ११ बजेदेखि सुरु हुने उक्त बैठक आइतवार सम्म चल्नेछ ।

आजदेखि सुरु हुने बैठकमा केन्द्रीय पदाधिकारीको चयन, समसामयिक राजनीतिक विषय, एमसीसीका कारण पार्टीभित्रै चर्किएको अन्तरसंघर्ष लगायतका विषयमा छलफल हुने बताइएको छ ।

गत पुष ११ देखि १८ गतेसम्म चलेको माओवादी केन्द्रको आठौं राष्ट्रिय महाधिबेशनले २४७ केन्द्रीय कमिटी चयन गर्दै सम्पन्न भएको थियो । सोहि केन्द्रीय समितिको आजदेखि बस्ने बैठकले पार्टीको वरिष्ठ उपाध्यक्ष, ६ उपाध्यक्ष, एक महासचिव, दुई उपमहासचिव, तीन सचिव र एक कोषाध्यक्ष चयन गर्ने बताइएको छ । समथै विधान अनुसार ६३ जना केन्द्रीय सदस्यहरु समेत मनोनित हुने बताइएको छ ।

एमसीसीका विषयमा व्यापक छलफल हुने
गत आइतवार सदनबाट अनुमोदन भएको अमेरिकी सहयोग परियोजना एमसीसीका विषयमा पनि आजको केन्द्रीय समितिको बैठकमा छलफल चल्नेछ । नेकपा माओवादी केन्द्रले संशोधन नगरि सदनबाट एमसीसी अनुमोदन गर्न नमिल्ले अडान राख्दै आएकोमा देश र संविधानको रक्षाका लागि भन्दै पार्टीका अध्यक्ष पुष्पकमल दाहाल ‘प्रचण्ड’ ले १२ बुँदे व्याख्यात्मक टिप्पणी’ सहित एमसीसी अनुमोदन गर्न सहमति जनाएपछि पार्टीभित्रै विवाद चुलिएको छ ।

अध्यक्ष प्रचण्ड र पार्टीका वरिष्ठ नेता नारायणकाजी श्रेष्ठबीच यतिबेला एमसीसीकै कारण दूरी बढेको छ । फागुन १६ गते एमसीसी अनुमोदनका विषयमा आयोजित पत्रकार सम्मेलनमा अध्यक्ष प्रचण्डले नेता नारायणकाजीले पार्टी छोडेर जानसक्ने लगायतका आशय व्यक्त गरेपछि नेता श्रेष्ठ झनै रुष्ट बनेका छन् ।

एमसीसी अनुमोदनका क्रममा समेत पार्टीका नेताहरु कृष्णबहादुर महरा, देव गुरुङ, गिरिराजमणि पोखरेल, लिलामणि पोखरेल लगायतले फरक मत राखेका थिए । नेता श्रेष्ठले त ‘एमसीसी पास गरिएको दिनलाई देशभक्त नेपालीले यसलाई कालोदिनका रुपमा लिनुपर्ने’ टिप्पणी समेत गरेका थिए ।

एमसीसी अनुमोदन महाधिबेशनको निर्णय विपरित भएको बताउँदै आएका नेता श्रेष्ठ लगायतले आजको बैठकमा एमसीसी अनुमोदनका विषयमा आफ्ना असन्तुष्टिहरु लिखितरुपमै राख्ने र व्यापक छलफल गर्ने बताउँदै आएका छन् ।

नेता श्रेष्ठले अध्यक्षको आशय पार्टी छोडेरै जाने भन्ने रहेको भए त्यसबारेमा पनि केन्द्रीयसमितिमै छलफल गरिने जनाएका छन् ।
उता अध्यक्ष प्रचण्डले आफ्नो भनाईको आशय त्यस्तो नभएको भन्दै निर्वाचनको संघारमा सबै मिलेरै जानुपर्ने बताउँदै आएका छन् ।