हामी सबैकाे संसारन्यूज

काठमाडौं । रुसी सेनाले युद्धको नौ दिनमा युरोपको सबैभन्दा ठूलो जापोरिजिया आणविक प्लान्टलाई कब्जामा लिएको छ । समाचार संस्था रोयर्टसका अनुसार शुक्रबार रुसी सेनाले उक्त प्लान्टलाई कब्जामा लिएको हो । रुसी सेनाले सुरुमा उक्त क्षेत्रमा मिसाइल आक्रमण गरेको थियो ।

रुसी सेनाले यूक्रेनको मात्रै नभई पुरै यूरोपको ठूलो आणविक केन्द्र कब्जामा लिएसँगै विश्वभर हलचल मच्चिएको छ । यूक्रेनका राष्ट्रपति जेलेन्सीले तत्कालै ‘बोल्ड’ कदम चाल्न अमेरिका र बेलायतलाई अपिल गरेका छन् । रुसी सेनाले आणविक केन्द्र कब्जामा लिए लगत्तै जेलेन्स्कीले अमेरिकी राष्ट्रपति जो बाइडेन र बेलायती प्रधानमन्त्री बोरिस जोनसनलाई फोन गरेका थिए ।

तत्काल आक्रमण बन्द गर्न अमेरिका र बेलायतको चेतावनी

अमेरिका र बेलायतले तत्कालै युद्ध रोक्न रुसलाई चेतावनीपूर्णं आग्रह गरेका छन् । दुवै देशले संयुक्त राष्ट्र सुरक्षा परिषद्को आकस्मिक बैठक बोलाउने पनि तयारी गरेका छन् । बेलायती प्रधानमन्त्रीको कार्यालयका अनुसार रुसले तुरुन्त आक्रमण बन्द नगरेमा गम्भीर कदम उठाउन दुवै देश बाध्य हुने सूचना रुसलाई पठाइएको छ ।

दुवै देशले सुरक्षा परिषद्को आकस्मिक बैठक पछि निर्णायक निर्णय लिने बताएका छन् ।

आणविक उर्जा एजेन्सीद्धारा खतराको चेतावनी

अन्तर्राष्ट्रिय आणविक ऊर्जा एजेन्सीले जापोरिजिया आणविक प्लान्टमाथि आक्रमण र कब्जाको विषयले खतराको अवस्था निम्तिएको चेतावनी दिएको छ । रुसी सेनाले आणविक प्लान्टमाथि आक्रमण गर्दै कब्जामा लिए लगत्तै आणविक उर्जा एजेन्सीले एक ट्वीट गर्दै उक्त क्षेत्रमा तत्कालै गोलाबारी रोक्न भनेको छ ।

एजेन्सीका महानिर्देशक राफेल मारियानो ग्रोसीले युक्रेनका प्रधानमन्त्री डेनिस स्माइगल र युक्रेनी आणविक नियामक र अपरेटरसँग कुरा गरेका छन् । उनले दुवै पक्षका सेनालाई उक्त क्षेत्रमा लडाईँ रोक्न भनेका छन् । उर्जा केन्द्रले उक्त आणविक प्लान्ट विस्फोट भएमा यूरोप नै खतरामा पर्न सक्ने चिन्ता व्यक्त गरेको छ ।

सम्बन्धित समाचार

रुसले कब्जा गर्‍यो यूक्रेनको सबैभन्दा ठूलो न्यूक्लियर प्लान्ट