हामी सबैकाे संसारन्यूज

काठमाडौं । नेकपा (माओवादी केन्द्र)को आजदेखि सुरु केन्द्रीय समिति बैठक पर्सी (आइतबार)सम्मको लागि स्थगित भएको छ । शीर्ष तहका नेताहरुबीच छलफलका लागि भन्दै बैठक स्थगित भएको हो ।

माओवादी केन्द्रकी नेतृ मिना शर्माले बताएअनुसार भोली शीर्ष तहका नेताहरुबीच छलफल हुनेछ । विवादमा रहेको एमसीसी र पदाधिकारी चयनको विषयमा नेताहरुबीच छलफल हुने उनले बताइन् ।

आजको बैठकमा पार्टी अध्यक्ष पुष्पकमल दाहाल ‘प्रचण्ड’ र नेता नारायणकाजी श्रेष्ठले सम्बोधन गरेका थिए । बैठकमा प्रचण्डले एमसीसी पारित गर्नुको कारण बताएका थिए भने नेता श्रेष्ठले महाधिवेशनको म्यान्डेट र नेताहरुबीचको सहमति बिना एमसीसीमा निर्णय लिइएको भन्दै असन्तुष्टि व्यक्त गरेका थिए ।

आजको बैठकमा नेता श्रेष्ठले उठाएका विषयमा शीर्ष नेताहरुबीच छलफल गरि समाधान खोजिने छ ।