हामी सबैकाे संसारन्यूज

काठमाडौं । हुण्डी कारोबारमा संलग्न रहेका दुई व्यक्तिलाई प्रहरीले पक्राउ गरेको छ ।

पक्राउ पर्नेमा काठमाण्डौंको मख्खनमा बिमला ईन्टरनेशनल नामक कम्पनीबाट नक्कली गरगहनाका कारोबारी भारतीय नागरिक पक्राउ परेका हुन् ।

भारत पश्चिम बंगाल दार्जिलिङका अमित अग्रवालले राजस्व छली तथा हुण्डी कारोबार गर्दै आइरहेको सूचनाको आधारमा गएको प्रहरीले आइतबार दिउँसो अग्रवालको ताहाचलस्थित डेरामा छापा मार्दा नगद १ करोड ५० लाख रुपैयाँसहित अग्रवाललाई पक्राउ गरेको हो ।

अग्रवालको डेरामा पुगेका प्रहरीले उनकै घरमा रहेका बिकी खड्गी नामका व्यक्तिसँग सोधपुछ गर्दा कालीमाटीस्थित जीवनदृष्टी बहुउद्धेश्यीय सहकारी संस्थाबाट ५० लाख रुपैयाँ ल्याएर अग्रवाललाई दिएको बताएपछि प्रहरीले अग्रवालको कोठामा छापा मारेको थियो ।
उनीहरु दुवैजनालाई पक्राउ गरि थप अनुसन्धान गरिएको प्रहरीले जनाएको छ ।

प्रहरीले काठमाडौं टंकेश्वरी हाल किर्तिपुरमा बस्ने २४ वर्षीय खड्गीको साथबाट नगद २४ हजार, बिभिन्न बैंकको चेक, भौचर प्याड र मोबाइल एकथान बरामद गरेको छ भने ३२ वर्षीय अग्रवालको डेराबाट १ करोड ५० लाख रुपैयाँसहित ल्यापटप, मोबाइल तथा कारोबार सम्बन्धी विभिन्न कागजपत्र बरामद गरेको छ ।