हामी सबैकाे संसारन्यूज

काठमाडौं । पाटन उच्च अदालतले गैरआवासीय नेपाली संघको निर्वाचन रोकेर छलफलमा आउन अन्तरिम आदेश दिएको छ ।

गैरआवासीय नेपाली संघका पूर्वअध्यक्ष शेष घलेले सोही अदालतको आदेशविपरीत निर्वाचनको घोषणा गरेपछि दुवै पक्षलाई अदालतले बोलाएको हो ।

अदालतले निर्वाचन र महाधिवेशन प्रक्रिया तत्काल रोक्न पाटन उच्च अदालतले ९ चैतसम्मका लागि अन्तरिम आदेश जारी गरेको छ ।

न्यायाधीश दुर्गाबहादुर विश्वकर्माको एकल इजलासले दुवै पक्षलाई छलफलका लागि बुधबार (९ चैत) मा बोलाउने र त्यतिन्जेलसम्म निर्वाचनको सम्पूर्ण प्रक्रिया रोक्न सोमबार अन्तरिम अल्पकालीन आदेश दिएको हो ।

दुवै पक्षलाई आ–आफ्नो प्रमाणसहित छलफलका लागि अदालतले बोलाएको छ । अदालतको आदेशपछि घले समूहले निर्वाचन गराएमा मानहानिको मुद्दा दर्ता गर्ने अर्काे पक्षको तयारी छ । अदालतको फैसलापछि सहमतिका लागि नेतृत्वलाई दबाब बढेको छ ।

गैरआवासीय नेपाली संघमा बढेको तिब्र विवादका कारण यतिबेला संस्था दुई समुहमा विभाजत बनेको छ । संघमा अध्यक्षको नेतृत्वमा दावी गरिरहेका डा. बद्री केसी र कुल आचार्य पक्षले छुट्टा छुट्टै रुपमा अध्यक्षमा आ–आफ्नो नेतृत्व दावी गरिरहेका छन् ।

संस्थापन पक्षबाट वर्तमान उपाध्यक्ष डा. बद्री केसीलाई अध्यक्षको उम्मेदवारको रुपमा उभ्याइएको छ भने केसीसँग प्रतिश्प्रधा गर्न अमेरिकाबाट रबिना थापाले पनि अध्यक्षमा उम्मेदवारी घोषणा गरेकी छन् । उक्त समूहले यहि मार्च २४–१५ मा नयाँ नेतृत्वका लागि निर्वाचनको मिति समेत तोकिसकेको छ । अध्यक्षमा थापा र केसीबीच प्रतिश्प्रर्धा हुने देखिएपनि अन्य धेरै पदमा निर्विरोध जस्तै देखिएको छ ।

उता एनआरएनए संरक्षक शेष घले पक्षले भने कूल आचार्यलाई अध्यक्षको उम्मेदवारका रुपमा उभ्याउँदै अन्य पदको समेत टुंगो लगाईसकेको जनाइएको छ । मार्च २२ देखि २५ सम्म अधिबेशनको मिति तय गरिसकेको छ ।

उक्त समुहले अध्यक्षमा कुल आचार्य, उपाध्यक्षमा हिक्मत थापा, सुनिल शाह, त्रिलोक गुरुङ र नरेन्द्र भाट, महासचिवमा केशव पौडेल, सचिवमा नारायण आचार्य, खगेन्द्र आचार्य, प्रविण गुरुङ तथा युवा उपाध्यक्षमा राज रेग्मीको नाम प्रस्ताव गरिएको छ । साथै महिला उपाध्यक्षमा जानकी गुरुङ र महिला सचिवमा भोमा लिम्बुलाई राखिएको छ ।

कोषाध्यक्षमा राजन त्रिपाठी र सोम सापकोटा मध्ये एकजना र सह–कोषाध्यक्षमा विमला सापकोटा र योगिता थापा मध्ये १ जना नाम प्रस्ताव गरिएको बताइएको छ ।

एनआरएनए निर्वाचनः अध्यक्षमा थापा र केसीबीच प्रतिश्पर्धा हुने, ६० मध्ये ३३ पदमा निर्विरोध