हामी सबैकाे संसारन्यूज

काठमाडौं । युएईको जेलमा रहेका पत्रकार उमाकान्त पाण्डेको रिहाईको माग गर्दै राजधानीको माइतीघर मण्डलामा प्रदर्शन भएको छ ।

झण्डै १ महिनादेखि युएईको जेलमा रहेका पत्रकार पाण्डेको रिहाइको माग गर्दै युथ कांग्रेस नेपालले आज माइतीघर मण्डलामा प्रदर्शन गरेको हो । पाण्डेका आफन्त तथा परिवारले पाण्डेलाई जेल पुर्याउनका लागि दूतावासको भूमिका रहेको आरोप लगाउँदै आएका छन् ।

प्रदर्शनमा उत्रिएकाहरुले पत्रकार पाण्डे निर्दोष रहेको र उनको तत्काल सरकारले विनाशर्त रिहाइको माग गरेका छन् ।

युएईस्थित नेपाली दूतावासलाई लक्षित गरेर सामाजिक संजालमा स्टाटस लेखेकै कारण देखाएर दुबईको अदालतले पत्रकार पाण्डेलाई २० हजार दिराहाम जरिवाना र सम्पत्ति जफतसहित देश निकाला गर्ने सजाय सुनाएपछि उनी एक महिनादेखि दुबईको जेलमा रहेका छन् ।

पाण्डेले गत जनवरी ८ मा यस्तो स्टाटस लेखेका थिए–युएईमा भिजिट भिसाको समस्या कहिल्यै समाधान हुँदैन । किनकी भिजिट भिसालाई प्रोत्साहन र सहयोग दूतावास आफैले गरिरहेको छ । उदाहरणका लागि दूतावासमा स्थानीय कर्मचारी कत्ति नियुक्ति गरियो ? त्यसो गर्दा ती व्यक्तिलाई कुन भिसामा युएई बोलाइयो र अहिले काममा लगाइएको छ त्यो हेरे थाहा हुन्छ । भिजिट भिसाको मुख्य जरो दूतावास भित्रै छ, छ कसैको बोल्ने हिम्मत ? मिठो बोलेर मात्र हुँदैन नियत खराब भएपछि यो स्टाटसकै कारण कसैले गलत निर्णय नगरुन् । डिर्पोट गर्नु पर्दैन म नेपाल छु, तिम्रै अगाडि उपस्थित हुन आउछु छिट्टै, कालो कर्तुत सप्रमाण छन् । एकवर्ष दुःखमा थिए, अब शोकलाई शक्तिमा बदल्ने गरी आउनेछु ।’