हामी सबैकाे संसारन्यूज

काठमाडौं । चरम आर्थिक संकटका बीच सरकारको राजीनामाको माग गर्दै नागरिक आन्दोलन बढेपछि श्रीलंकामा २६ जना मन्त्रीहरुले सामुहिक राजिनामा दिएका छन् ।

श्रीलंकाका प्रधानमन्त्री महिन्दा राजापाक्षेबाहेक अन्य सबै २६ जना मन्त्रीहरुले राजीनामा दिएको बीबीसीले जनाएको छ ।

आर्थिक संकट चुलिँदै गएपछि दैनिक उपभोग्य सामग्री समेत उपलब्ध नहुँदा आन्दोलनकारीहरुले सडकमा प्रदर्शन गर्दै सरकारको राजीनामाको माग गरेका थिए ।

कोरोनाका कारण पर्यटन क्षेत्र धरासायी भएको तथा विदेशी ऋणका कारण आर्थिक रुपमा थला पर्दै गएको श्रीलंकाले डलरको कमीका कारण अत्यावश्यक खाद्यान्न, औषधि, इन्धन लगायतका वस्तुसमेत आयात गर्न नसकेको समाचारहरु सार्वजनिक भइरहेका छन् ।

आक्रोशित नागरिक सडकमा अराजक शैलीमा उत्रिएपछि श्रीलंकन सरकारले शनिबार बेलुका ६ बजेदेखि ३६ घण्टे कफ्र्यु आदेश जारी गरेको थियो । कफ्र्यु लागू भएका बेला अनुमति विना हिँड्डुल गर्न नपाइने भएपनि हिँड्डुल गरेका ६०० बढीलाई आइतबार प्रहरीले पक्राउ गरेको थियो ।

आइतबार कफ्र्युकाबीच ठूलो संख्यामा प्रदर्शन भएपछि रातिसम्म बसेको मन्त्रिपरिषद्को बैठकले २६ जना मन्त्रीहरुले सामूहिक राजीनामा दिएका हुन् । शिक्षामन्त्री दिनेश गुणवर्धनका अनुसार राष्ट्रपति गोटबाया राजापाक्षे र प्रधानमन्त्री महिन्दा राजापाक्षे बाहेक सबै मन्त्रीले प्रधामन्त्री समक्ष राजीनामा बुझाएका हुन् ।

प्रधानमन्त्री राजापाक्षेका छोरा नमल राजापाक्षेले सबैभन्दा पहिले राजीनामा बुझाएका थिए भने त्यसको एकघण्टापछि अन्य सबै मन्त्रीले राजीनामा दिएको बताइएको छ ।