हामी सबैकाे संसारन्यूज

काठमाडौं । सत्तारुढ गठबन्धनका दलहरुबिच चितवनका सबै स्थानीय क्षेत्रमा तालमेल गरेर जाने निर्णय भएको छ ।

गठबन्धन दलका जिल्ला संयोजकहरुको सोमबार बिहान बसेको बैठकले चितवनका सबै स्थानीय क्षेत्रमा चुनावी तालमेल गर्ने विषयमा निर्णय भएको हो ।

नेपाली कांग्रेशका जिल्ला सभापति राजेश्वर खनाल, नेकपा माओवादी केन्द्रका संयोजक रामचन्द्र अधिकारी, नेकपा (एकिकृत समाजवादी) का इन्चार्ज कृष्ण प्र. खनाल, जनता समाजवादी (जसपा) का अध्यक्ष प्रेम भुजेल र राष्ट्रिय जनमोर्चा (राजमो) का अध्यक्ष डम्बर पुरीसहितको बैठकले स्थानीय निकायको निर्वाचनमा गठबन्धनमा सहभागी दलहरुका बीच गठबन्धनको मर्म र भावना अनुरुप एक आपसमा सम्मान र हार्दिकताको विकास गर्दै संयुक्त रुपमा निर्वाचनमा सहभागी हुने निर्णय गरेको बताइएको छ ।

‘जिल्ला स्थित ७ वटै पालिकामा गठबन्धनका दलहरुबीच बैठक बसी चुनावी तालेमलका सन्दर्भमा संयुक्त संयन्त्र निर्माण गरी छलफल प्रक्रिया अगाडि बढाउने निर्णय गरियो । संयुक्त संयन्त्रको संयोजन नेपाली कांग्रेसको पालिका सभापतिले गर्ने समेत निर्णय गरियो ।’ गठबन्धनका जिल्ला संयोजकहरुद्धारा संयुक्त रुपमा जारी विज्ञप्तिमा भनिएको छ ।

त्यसैगरी सोहि बैठकले केन्द्रीय परिपत्र अनुसार दलगत वस्तुस्थितिको बारेमा प्रतिवेदन तयार गर्न प्रत्येक दलबाट १/१ जना प्रतिनिधि रहने गरी कार्यदल गठन गर्ने निर्णय समेत गरेको छ ।