हामी सबैकाे संसारन्यूज

काठमाडौं । निर्वाचन आयोगले आज दलहरूसँग छलफल गर्ने भएको छ ।

२०७९ बैशाख ३० गतेदेखि सुरु हुने स्थानीयतहको निर्वाचनको विषयमा केन्द्रीत रहेर छलफल गर्नका लागि आयोगले मंगलबार बिहान ११ः३० बजे दलहरुका प्रतिनिधिको बैठक डाकेको हो ।

आयोगका प्रवक्ता शालिग्राम शर्मा पौडेलका अनुसार निर्वाचनमा भाग लिने ७९ वटा दलहरूलाई छलफलका लागि बोलाइएको हो ।

आयोगले यसअघि देशका विभिन्न स्थानमा आचारसंहिता पालना र प्रभावकारी कार्यान्वयन विषयक कार्यक्रममा संचालन गरेको थियो ।

आयोगले आचारसंहिताको पालनाका सम्बन्धमा कठोर हुन दलहरुलाई सुझाव समेत दिएको थियो ।

त्यसैगरी आयोगले आगामी निर्वाचनका लागि सोमबारदेखि मतपत्र छाप्न सुरु गरेको हो ।

जनक शिक्षा सामग्री केन्द्रमा छापिने उक्त मतपत्र कूल २३ लहर समूहका ७७ प्रकारका एक करोड ९४ लाख थान मतपत्र छापिनेछन् ।

आयोगका प्रवक्ता पौडेलका अनुसार सबैभन्दा कम १६ लहरको मतपत्र डोल्पाको हुनेछ भने सबैभन्दा बढी ५६ लहरको मतपत्र काठमाडौँको हुनेछ ।

आयोगले निर्वाचनमा राजनीतिक दललाई प्रचारप्रसार र मतदाता शिक्षाका लागि सहज होस् भन्ने हेतुले आयोगले एक लाख ८० हजार थान नमूना मतपत्र छपाई गरिसकेको छ ।

राजनीतिक दलको आधिकारिक पत्रका आधारमा रु सात हजारमा देशभरको तथा पाँच हजार तिरेर प्रदेशको मतदाता नामावली आयोगबाट लिने सकिने जानकारी दिइयो ।

जिल्लाबाट सम्बन्धित दलको पत्र वा उम्मेदवारको निवेदनका आधारमा जिल्लाभरको रु तीन हजार, पालिका तहको रु एक हजार तथा वडाको रु ५०० तिरेर सम्बन्धित जिल्ला निर्वाचन कार्यालयबाट मतदान नामावलीको विद्युतीयप्रति लिन सकिने व्यवस्था छ ।

निर्वाचन तथा मतदाता शिक्षा निर्देशिका, निर्वाचन तालिम निर्देशिका, मतदान निर्देशिका र मतगणना निर्देशिका आयोगबाट पारित भई कार्यान्वयनमा आइसकेको सो अवसरमा जानकारी दिइयो ।