हामी सबैकाे संसारन्यूज

काठमाडौं । स्थानीय निकायको निर्वाचन आउन अब मात्रै ३१ दिन बाँकी छ । तर, ३१ दिन बाँकी हुँदा पनि सत्ता गठबन्धनका दलहरुले न त घोषणा पत्र तयार गर्न सकेका छन् न त उम्मेदवार छान्न । निर्वाचनमा तालमेल गर्ने निर्णय गरेका दलहरु तालमेलको मोडालिटीमै अलमल परेका छन् ।

केही दिनदेखि मोडालिटी तयार गर्न दलहरु पटक–पटक छलफलमा जुटेको भएपनि निष्कर्ष भने निस्कन सकेको छैन् । सोमबार बसेको गठबन्धनको बैठक पनि विना निष्कर्ष टुंगीएको छ । दलहरुभित्र आन्तरिक रुपमै तालमेलको विषयमा सहमति नजुट्दा निष्कर्ष निस्कन नसकेको हो ।

गठबन्धनका दलहरुबीच आसन्न स्थानीय निर्वाचनमा एमालेविरुद्ध देशव्यापी गठबन्धन गरेर जाने सहमति भएको भएपनि धेरैजसो स्थानमा कसको उम्मेदवार हुने भन्ने अलमल छ । दलहरुबीच कुन स्थानीय तह आफुले लिने र कुन छाड्ने भन्ने विषयमा विवाद देखिन्छ ।

गठबन्धनले कांग्रेस वरिष्ठ नेता रामचन्द्र पौडेल नेतृत्वमा ५ दलीय निर्वाचन तयारी तथा अनुगमन समिति गठन गरेको छ । समितिले तालमेलको मोडालिटीबारे सुझाब पनि दिएको छ । तर, मुख्यतः नेपाली कांग्रेसभित्रै पौडेल नेतृत्वको समितिले बुझाएको सझाबप्रति विवाद भएको देखिन्छ । शेखर कोइराला पक्षले शुरुदेखि नै पौडेल नेतृत्वको समितिप्रति अविश्वास देखाएको थियो ।

एमालेलगायतका दलहरु धमाधम उम्मेदवार टुंग्याउँदै

सत्ता गठबन्धन अलमलमा पर्दा प्रमुख प्रतिपक्षी एमालेलगायतका साना दलहरुले भने धमाधम उम्मेदवार टुंगो लगाउन थालेका छन् । राजनीतिको केन्द्रमा देखिएको भरतपुर महानगरमा एमालेले उम्मेदवार टुंगो लगाएको छ । आइतबार एमालेले प्रदेश सांसद विजय सुवेदीलाई मेयरको उम्मेदवार बनाउने निर्णय गरेको थियो ।

भरतपुरमा माओवादी केन्द्रले आफ्नो उम्मेदवार हुनुपर्ने दाबी गरिरहेको छ भने कांग्रेसले पनि नछाड्ने अडान लिएको छ । जहाँ एमालेले उम्मेदवार तय गरेसँगै सत्ता गठबन्धनलाई थप दबाब बढेको देखिन्छ ।

यता दमकमा राप्रपाले उम्मेदवार टुंगो लगाएको छ । एमालेसँग तालमेलको तयारी गरिरहेको राप्रपाले शनिबार राम थापालाई एकल रुपमै मेयरको उम्मेदवार घोषणा गरेको हो ।

एमालेले वडा तहदेखि नै उम्मेदवार छनोट प्रक्रियालाई तीव्रता दिएको छ । एमालेले चैत २६ सम्म उम्मेदवार टुंग्याउन तयारी गरेको भएपनि उसले क्रमशः वडा तहदेखि नै टुंग्याउने प्रक्रिया शूरु गरेको छ ।