Sansar News
काठमाडौं । यातायात व्यवसायी राष्ट्रिय महासंघको अध्यक्षमा विजयबहादुर स्वाँर निर्विरोध निर्वाचित भएका छन् ।
देशभरका यातायात व्यवसायीहरूको छाता संस्था नेपाल यातायात व्यवसायी राष्ट्रिय महासङ्घको चैत २७ देखि २९ गतेसम्म चलेको महाधिबेशनले स्वाँरलाई महासंघको अध्यक्षमा सर्वसम्मत निर्वाचित गरेको हो ।
त्यस्तै महासंघको तीन वरिष्ठ उपाध्यक्ष पदका लागि चार आंकाक्षी भएपछि मतदानबाट टुंगो लगाइएको थियो । बुधबार सम्पन्न मतगणना अनुसार वरिष्ठ उपाध्यक्षहरुमा सरोज सिटौला, हरिशरण केसी र ऐनकुमार शाही निर्वाचित भएका छन् । अर्का आकांक्षी केदार पौडेल पराजित भएका छन् ।
त्यसैगरी महासंघको महासचिवमा डेकनाथ गौतम, उपमहासचिवमा पुरूषोत्तम सिंखडा, शम्भू रिजाल र गगन रोका, कोषाध्यक्षमा ज्ञानेन्द्र श्रेष्ठ र सहकोषाध्यक्ष अर्जुन गौतम निर्वाचित भएका छन् ।
तीन वर्षका लागि अध्यक्षमा निर्वाचित स्वाँर नेपाली कांग्रेसका नेता समेत हुन् । उनी कैलाली क्षेत्र नम्बर २ बाट कांग्रेस महाधिवेशन प्रतिनिधि तथा महासमिति सदस्य हुन् ।
वि.सं.२०७८ चैत ३० बुधवार ०९:५५ मा प्रकाशित
