हामी सबैकाे संसारन्यूज

काठमाडौं । नेकपा (एमाले)का अध्यक्ष केपी शर्मा ओलीले सरकारले नेत्रविक्रम चन्द नेतृत्वको नेकपालाई हतियार बनाएर स्थानीय तहको चुनाव सार्न खोजेको आरोप लगाएका छन् । बुधबार विराटनगर विमानस्थलमा सञ्चारकर्मीहरूसँगको कुराकानीमा ओलीले चुनाव सार्न नदिइने बताए ।

“नेत्रविक्रम चन्द नेतृत्वको नेकपा स्थानीय तहको चुनाव सार्ने हतियार हुन्छ कि भन्ने सन्देशको स्थिति बढेको छ तर त्यस्तो हुनु हुँदैन”, उनले भनेका छन्, “लोकतन्त्रका लागि संविधान अनुसार देश चल्नु पर्छ भन्ने पक्षमा छौं ।”

चन्दले नेतृत्व गरेको नेकपालाई चुनावमा सहभागी हुन आफूले आहृवान गरेको ओलीको भनाई छ ।

राप्रपासँग चुनावी तालमेल हुन्छ

अध्यक्ष ओलीले आगामी चुनावमा कमल थापा नेतृत्वको राप्रपासँग चुनावी तालमेल हुने बताएका छन् । उनले एमाले नेतृत्वको गठबन्धनले सत्ता गठबन्धनलाई पत्तासाफ पार्ने बताए ।

“राप्रपालगायत अरु पनि दल हामीसँग मिल्न सक्छन्”, अध्यक्ष ओलीले भने, “स्थानीय चुनावमा गठबन्धनवालालाई एमालेले पत्तासाफ पार्छ ।”

एमाले र कमल थापा नेतृत्वको राप्रपाबीच यसअघि नै चुनावी गठबन्धन गर्ने विषयमा सहमति भइसकेको छ । थापा नेतृत्वको राप्रपा एमालेकै सुर्य चुनाव चिन्हबाट लड्ने तयारीमा छ ।