हामी सबैकाे संसारन्यूज

काठमाडौं । प्रधानमन्त्री शेरबहादुर देउवाले सत्ता गठबन्धन टुटाउनै नहुने बताएका छन् । नेपाली विद्यार्थी संघको स्थापना दिवसको अवसरमा मंगलबार आयोजित कार्यक्रममा बोल्दै यस्तो बताएका हुन् । गठबन्धन टुटेमा कम्युनिस्ट पार्टीहरु एमालेसँग मिल्न जाने देउवाको चिन्ता छ।

“हामीले गठबन्धन टुटाउने हो भने कम्युनिष्टहरु एमालेसँग मिले भने हाम्रो के अवस्था होला ?”, देउवाले भनेका छन्, “पहिला ९२०७४०को जस्तै होला। अहिले एकलौटी रुपमा बहुमत आउने सम्भावना छैन ।”

देउवाले गठबन्धन टुटाउन चौतर्फी षड्यन्त्र पनि भइरहेको बताएका छन् । उनले पाँचदलीय गठबन्धनबाट आफू प्रधानमन्त्री भएको र यो गठबन्धन चुनावसम्मै लैजाने बताए। गठबन्धनमा रहेका दलहरूलाई चुनावमा उचित स्थान दिनुपर्ने देउवाको भनाई छ ।

“कांग्रेस ठूलो पार्टी छ धेरै सिट लिनुस्। हामीलाई पनि केही सिट दिनुस् भनेका छन्”, देउवाले भने, “उनीहरूलाई पनि सम्मानजनक स्थान दिनुपर्छ। एकोहोरो कुरा गरेर हुन्न । गठबन्धन बचाउनै पर्छ ।”

विगतमा एमाले र माओवादी मिल्दा कांग्रेसले नराम्रो हार व्यहोरेको देउवाको भनाई छ ।