Sansar News
काठमाडौं । चितवनको भरतपुर महानगरपालिकामा नेकपा एमाले र राष्ट्रिय प्रजातन्त्र पार्टी (राप्रपा) बीच चुनावी तालेमल हुने भएको छ ।
आइतबार राति दुवै दलबीच भएको सहमति अनुसार भरतपुर महानगरमा एमालेले प्रमुख पद राप्रपाले उपप्रमुख पद लिने सहमति भएको एमाले चितवनका इन्चार्ज तथा केन्द्रीय सदस्य देवी ज्ञवालीले जानकारी दिएका छन् ।
उनका अनुसार एमालेले महानगरको प्रमुख पदमा विजय सुवदेीलाई उम्मेदवार बनाएको छ भने उपमेयरमा राप्रपाका उम्मेदवारलाई सघाउने सहमति भएको छ ।
उक्त सहमति अनुसार महानगरको वडा नं. १५ र २६ को वडाध्यक्ष पाउने राप्रपाले पाउने भएको छ भने वडा नंं. ४,११, १६,१९ र २४ का वडा अध्यक्षमा दुवै दलबीच मित्रवत प्रतिश्पर्धा हुने बताइएको छ । साथै बाँकी वडामा एमालेले वडाअध्यक्षसहित सदस्य र केही वडामा एमालेले अध्यक्ष लिने भएको छ भने राप्रपाले दुईजना सदस्य पाउने सहमति भएको छ ।
यसअघि चुनावी तालेमलका लागि नेपालगन्ज लगायतका केही स्थानीयतहमा राप्रपा र एमालेबीच छलफल भएपनि सहमति भने हुन सकेको थिएन ।
वि.सं.२०७९ वैशाख १२ सोमवार ०८:२३ मा प्रकाशित
