हामी सबैकाे संसारन्यूज

काठमाडौं । नेकपा (एमाले)ले पोखरा महानगरपालिकाको मेयरका लागि दीपक पौडेललाई हटाएर कृष्ण थापाको नाम अघि सारेको छ । सुन चोरीको भिडियो भाइरल बनेपछि पौडेललाई दिएको टिकट खोसेको एमालेले फेरि उस्तै विवादित छविका व्यक्ति कृष्णबहादुर थापालाई अघि सारेको हो ।

एमालेले उपमेयरमा भने मञ्जुदेवी गुरुङलाई नै निरन्तरता दिने भएको छ । एमाले सचिवालयले शनिबार मात्रै मेयरमा पौडेल र उपमेयरमा गुरुङलाई टिकट दिने निर्णय गरेको थियो । तर, सुन चोर्दै गरेको भनिएको भिडियो भाइरल बनेपछि एमालेले सोमबार उम्मेदवार फेरेको हो ।

तर, मेयरको उम्मेदवार बनाइएका थापा पनि विवादित छविकै पात्र हुन् । मेडिकल व्यवसायी थापाले धेरै प्रकृतिका व्यवसायमा हात हालेका छन् । तर, थापाको धेरै व्यवसायहरु विवादित प्रकृतिका छन् । उनीमाथि गुण्डा संरक्षण गरेको आरोप पनि छ ।

दुई वर्ष अघि मात्रै थापामाथि जातीय विभेद गरेको गम्भीर आरोप लागेको थियो । तर, उनीविरुद्व परेको निवेदनमाथि कुनै कारबाही भएको छैन । थापाविरुद्व प्रदेश कमिटी र संसदीय दलमा ०७७ वैशाख २६ मा उजुरी परेको थियो ।

थापाको विषयमा संघीय संसदमा पनि छलफल भएको थियो । तर, एमालेको केपी शर्मा ओली निकटका उनीमाथि कतैबाट कारबाही हुन सकेन ।

उनीविरुद्व हाल पनि कास्की जिल्ला अदालतमा उक्त मुद्दा विचाराधीन अवस्थामै छ ।

सम्बन्धित समाचार

पोखराको मेयर पदमा पौडेलको नाम काटेर कृष्ण थापालाई अघि सार्यो एमालेले