हामी सबैकाे संसारन्यूज

काठमाडौं । पाँच दलीय गठबन्धनका बीचमा भएको सहमतिलाई अस्वीकार गर्दै पोखरा र भरतपुर महानगरमा कांग्रेसको असन्तुष्ट पक्षले स्वतन्त्र रुपमा उम्मेदवारी दर्ता गराएका छन् । सोमबार पोखरामा ऋषि सापकोटा र भरतपुरमा जगन्नाथ पौडेलले मेयरको रुपमा उम्मेदवारी दर्ता गराएका हुन् ।

दुवै ठाउँमा र्‍यालीसहित नेताहरु उम्मेदवारी दर्ता गराउन पुगेका थिए ।

भरतपुरको मेयरमा उम्मेदवारी दिएका पूर्वसांसद एवं कांग्रेस नेता जगन्नाथ पौडेलले कार्यकताको स्वाभिमानलाई जोगाउन उम्मेदवारी दिएको बताए । उनले आफ्नो उम्मेदवारी फिर्ता नलिने पनि स्पष्ट पारेका छन् ।

यता पोखराको मेयरमा उम्मेदवारी दिएका कांग्रेस नेता सापकोटाले आम कांग्रेस शुभेच्छुकको मनोभावनाअनुसार उम्मेदवारी दिएको बताए । उनले अन्य पार्टीको चुनाव चिन्हमा मतदान गर्न नसक्ने भन्दै उम्मेदवारी फिर्ता नहुने स्पष्ट पारे ।

पाँच दलीय गठबन्धनबीच भएको सहमतिअनुसार पोखरामा नेकपा (एकीकृत समाजवादी)का नेता धनराज आचार्यले उम्मेदावारी दिएका छन् भने भरतपुरमा माओवादी केन्द्रकी नेतृ रेणु दाहालले मेयरमा उम्मेदवारी दिएकी छिन् । तर, गठबन्धनबीच भएको सहमतिअनुसार कांग्रेसले उम्मेदवारी दिएका ठाउँमा भने अन्य दलले उम्मेदवार खडा गराएका छैनन् ।