हामी सबैकाे संसारन्यूज

काठमाडौं । अर्थमन्त्री जनार्दन शर्माले सम्पत्तिको लेखापरीक्षण गर्ने क्रममा जोड-घटाउमा थोरै मात्र तलमाथी भए राष्ट्रिय अर्थतन्त्रमा नै असर पर्ने बताएका छन् । अर्थ मन्त्री शर्माले नेपाल चार्टर्ड एकाउन्टेन्ट्स संस्था (आइक्यान) ले आज काठमाडौंमा आयोजना गरेको प्रथम राष्ट्रिय लेखा व्यवसायी सम्मेलनलाई सम्बोधन गर्दै यस्तो बताएका हुन् ।

अर्थ मन्त्री शर्माले मुलुकको अर्थतन्त्र सबलीकरणका लागि मर्यादित र व्यावसायिक लेखापरिक्षण हुनुपर्ने बताए । उनले सम्पूर्ण सम्पत्तिको सही लेखाजोखा गर्नुपर्ने दायित्वबाट लेखापरीक्षक बिमुख हुन नहुने धारणा समेत राखे ।

अर्थ मन्त्री शर्माले लेखापरीक्षण व्यवसाय अर्थतन्त्रको मूल आधार र समग्र देशको आर्थिक चित्र देखाउने ऐना भएको बताए । उनले वित्तीय अनुशाशन कायम गर्न/गराउन लेखापरीक्षकको भूमिका महत्वपूर्ण हुने समेत बताए ।

मन्त्री शर्माले लेखापरीक्षण कुनै संस्था वा कम्पनीको हिसाबकिताबमा मात्रै सिमित नभई समग्र देशको सम्पत्ति मूल्याङ्कनमा पनि प्रयोग हुनुपर्ने बताए । उनले अर्थतन्त्र सुधारका लागि सबै क्षेत्रको अडिट हुनुपर्ने बताउँदै हिमालको सम्पत्ती, तराईको जमिन, देशभरका नदीमा बगेको पानीलगायतको अडिट गरेर राष्ट्रिय सम्पत्ति यकिन गर्नुपर्ने बेला आएको बताएका छन् ।