हामी सबैकाे संसारन्यूज

चितवन । नेपाली कांग्रेस चितवन जिल्लाका निवर्तमान सभापति जीतनारायण श्रेष्ठले भरतपुर महानगरमा रेनु दाहाललाई जिताउन आफुहरु तयार रहेको बताएका छन् ।

पाँच दलीय गठबन्धनद्धारा बिहीबार चितवनको भरतपुरमा आयोजित आमसभामा सम्बोधन गर्ने क्रममा महानगरको मेयरमा रेनुलाई जिताउन आफुहरु तयार रहेको तर विगतमा जस्तो धोका हुन नहुने आग्रह गरेका छन् ।

‘हाम्रो सोझो सभापति जे भन्यो त्यही गर्नुहुन्छ, भोलिका दिनमा ढाँट्ने काम धोका दिने काम नहोस्,’ माओवादी केन्द्रका अध्यक्ष प्रचण्डलाई इंगित गर्दै उनले भने, ‘जे प्रतिवद्धता पाँच वर्षअघि गरेका थियौं, त्यो तीन महिनापछि टुट्यो ।’

नेपाली कांग्रेस चितवनले आफुहरु गठबन्धनका उम्मेदवारलाई जिताउन तयार रहेको बताउँदै पार्टीको निर्णय भन्दा अगाडि आफुहरुमा केही गुनासो भएपनि अहिले एक ढिक्का भएर अगाडि बढ्ने बताए ।

चितवन कांग्रेस यतिबेला स्पष्टरुपमा दुई धारमा देखिएको छ । केन्द्रको निर्णयसँग असन्तुष्ट बनेका एक पक्षले जगन्नाथ पौडेलाई स्वतन्त्र उम्मेदवारमा उठाएको छ । कांग्रेसका वरिष्ठ नेता रामचन्द्र पौडेलले आज बिहान जगन्नाथलाई भेटेर उम्मेदवारी फिर्ता लिन गरेको आग्रहमा जगन्नाथले चितवनमा नेपाली कांग्रेसलाई जोगाउन आफुले स्वतन्त्र उम्मेदवारी दिएको र फिर्ता नलिने अडान दोहोर्याएका थिए ।

उम्मेदवारी फिर्ता लिन गरेको पौडेलको आग्रहमा चितवनका जगन्नाथले दिए यस्तो जवाफ