Sansar News
काठमाडौं । नेकपा (माओवादी केन्द्र) का अध्यक्ष एवम् पूर्व प्रधानमन्त्री पुष्पकमल दाहाल ‘प्रचण्ड’ले नेपाली कांग्रेसबाट बेइमानी हुनसक्ने आशंका व्यक्त गरेका छन् । कैलालीको कैलारी गाउँपालिकामा आयोजित चुनावी सभालाई सम्बोधन गर्दै प्रचण्डले गठबन्धनबीच भएको सहमतिलाई कांग्रेसले अझै पालना नगरेको बताए ।
कांग्रेसले सहमति बाहिर गएर दिएको उम्मेदवारी फर्ता नगरेको भन्दै प्रचण्डले धोका हुनसक्ने आशंका व्यक्त गरेका हुन् ।
“नेपाली कांग्रेसको एक जना स्थानीय नेतासँग पनि मेरो कुरा भयो, म र प्रधानमन्त्री शेरबहादुर देउवासँगै आएका छौँ”, प्रचण्डले भने, “उहाँसँग कुरा गरेर कांग्रेसले जसरी उम्मेदवारी दिएको छ, खारेज नहुने हो भने हामी एक्लै चुनाव लड्नुपर्दछ, हाम्रा उम्मेदवारलाई विजय गराउन अपिल गर्दछु, हाम्रा लागि बेइमानी र षड्यन्त्र स्वीकार्य छैन ।”
उनले गठबन्धन अझै ‘क्लियर’ नभएको बताए । प्रचण्डले स्वतन्त्र उम्मेदवारी दिएका आफ्ना उम्मेदवारलाई जिताउन पनि आग्रह गरेका छन् ।
कैलारी गाउँपालिकामा सत्तारुढ गठबन्धनबाट माओवादीले अध्यक्ष र कांग्रेसले उपाध्यक्ष पाउने सहमति भएको थियो । तर कांग्रेसले अध्यक्षमा बागी उम्मेदवारी दिन लगाएको छ ।
वि.सं.२०७९ वैशाख २६ सोमवार १३:३१ मा प्रकाशित
