हामी सबैकाे संसारन्यूज

काठमाडौं । प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीले वाइडबडी काण्डको छानबिन गर्न सरकारलाई चुनौति दिएका छन् । बिहीबार प्रतिनिधिसभाको बैठकलाई सम्बोधन गर्दै ओलीले आफुँमाथि अनावश्यक आरोप लगाइएको भन्दै छानिबनको माग गरे ।

“वाइडबडीदेखि अन्यमा मलाई जोडियो, यसमा कसले सम्झौता गर्‍यो, कसले भुक्तानी दियो ? मैले त सम्झौता भएपछि अन्तिम किस्ता मात्र दिएको हुँ”, ओलीले भनेका छन्, “यसमा पनि भ्रष्टाचार भएको लाग्छ भने छानबिन गर्नुस्, को–को कसरी संलग्न छन् ।”

ओलीले पूर्ववर्ती सरकारका पालामा भएका ३३ किलो सुनकाण्ड, बालुवाटार काण्डको आफुले छानबिन गरेर मुद्दा दायर गराएको बताए । उनले आफ्नो सरकारले भ्रष्टाचारका काण्ठलाई बाहिर ल्याएको र कारबाही गर्न थालेको दाबी गरे ।

रिर्जभ बैंकमा आफ्नो नाममा पैसा रहेको भनि चलाइएको आरोप मिथ्या भएको बताए । ओलीले आफ्नो सम्पूर्णं चल–अचल सम्पत्ति राज्यको नाममा गरेको भन्दै आफुले कि भ्रष्टाचार गर्ने भनि प्रश्न गरे । ओलीले आफ्नो बारेमा प्रश्न उठाउनेलाई आफ्नो सम्पत्ति सरकारको नाममा गर्न चुनौति दिए ।

ओलीले प्रश्न गरे, “मैले आफ्नो र श्रीमतीको नामको सबै चलअचल सम्पत्ति राज्यको नाममा गरेको छु । मैले राज्यका नाममा सम्पत्ति ल्याइदिन भ्रष्टाचार किन गर्नुपर्ने ? कुनै महानुभाव निस्किनुस् न राज्यका नाममा सम्पत्ति हस्तान्तरण गर्ने ? केपी ओलीलाई मुखभरिको जवाफ दिन भए पनि घोषणा गर्नुस् त ?”