हामी सबैकाे संसारन्यूज

काठमाडौं । भौतिक पूर्वाधार तथा यातायात मन्त्रालयअन्तर्गत यातायात व्यवस्था विभागले साउन १ गतेसम्ममा सवारी साधनमा इम्बोस्ड नम्बर प्लेट नराखे कारबाही गरिने बताइएको छ ।

विभागले वागमती र गण्डकी प्रदेशमा दर्ता रहेका सवारीहरुमा अनिवार्य रुपमा इम्बोस्ड नम्बर प्लेट जडान गर्ने सम्बन्धी सूचना जारी गर्दै नामाकरण भइसकेका प्रदेश माताहतका यातायात व्यवस्था कार्यालयहरुमा दर्ता रहेका सबै सवारी साधनहरु चरणबद्ध रुपमा इम्बोस्ड नम्बर प्लेट जडान गर्न २०७८ कात्तिक २२ गते नै सूचना निकालिएकोमा उक्त व्यवस्था कार्यान्वयन नभएको जनाएको छ ।

‘२०७८ कात्तिक २२ को नेपाल राजपत्रमा सूचना प्रकाशन गरिएको र यस विभागबाट बागमती प्रदेशको एकान्तकुना–ललितपुर र गुर्जुधारा–काठमाडौं तथा गण्डकी प्रदेशको पोखरा–कास्कीमा रहेका यातायात व्यवस्था कार्यालयहरुमा आवस्यक पूर्वाधारसमेत तयार गरिएकोमा ती कार्यालयहरुमा दर्ता भएका सवारीहरुमा हालसम्म पनि इम्बोस्ड नम्बर प्लेट जडान सम्बन्धी संघीय कानुन बमोजिमको व्यवस्था तथा निर्णय कार्यान्वयन नभएको प्रति यस विभागको गम्भीर ध्यानाकर्षण भएको छ ।’

विभागले वागमती र गण्डकी प्रदेशका उल्लेखित कार्यालयहरुमा दर्ता भएका सवारीहरुमा इम्बोस्ड नम्बर प्लेट सम्बन्धी व्यवस्था कार्यान्वयन भए/नभएको सम्बन्धमा साउन १ पछि ट्राफिक अनुगमन गरिने र तोकिए अनुसार इम्बोस्ड नम्बर प्लेट जडान नगरिएको पाइएमा कारबाही गरिने चेतावनी समेत दिएको छ ।