हामी सबैकाे संसारन्यूज

काठमाडौं । गैरआवासीय नेपाली संघले प्रधानमन्त्री शेरबहादुर देउवासँग भेटघाट गरेको छ ।

संघका कार्यकारी अध्यक्ष कूल आचार्य र अर्का अध्यक्ष डा बद्री के.सीसहित गएको एक प्रतिनिधि मण्डलले प्रधानमन्त्री देउवासँग भेटघाट गरी आउने १६ जुन २०२२ का दिन गैरआवासीय नेपाली नागरिकता, गैरआवासीय नेपालीहरुको लगानी, वैदेशिक रोजगार लगायत विषयमा हुन लागेको एक दिने कार्यशालामा प्रमुख आतिथ्यताका लागि अनुरोध गरेको हो ।

सो भेटका क्रममा कार्यकारी अध्यक्ष आचार्य र अध्यक्ष केसीले गैरआवासीय नेपाली नागरिकता, गैरआवासीय नेपालीहरुको लगानी, वैदेशिक रोजगार तथा सामाजिक सुरक्षा, विदेशमा बस्ने नेपालीहरुको मताधिकारको विषयका साथै म्यानमार र थाईल्याण्डमा रहेका नेपालीहरुको पहिचानको समस्या बारे अवगत गराउँदै उनीहरुलाई गैरआवासीय नेपाली परिचय पत्र उपलब्ध गराउन अनुरोध गरेका थिए । सो टोलीले नेपाल सरकारले हालै पेश गरेको नीति, कार्यक्रम तथा बजेटमा गैरआवासीय नेपाली संघले उठाउँदै आएका धेरैजसो विषयहरु संबोधन भएकोमा नेपाल सरकारप्रति हार्दिक आभार प्रकट गरेको थियो ।

प्रधानमन्त्री देउवाले प्रतिनिधि मण्डलले कार्यशालामा प्रमुख आतिथ्यताका लागि अनुरोध गरेकोमा धन्यवाद व्यक्त गर्दै आफ्नो कार्यतालिका हेरेर उपस्थित हुने जानकारी गराएको एनआरएनए सचिवालयले जनाएको छ ।

प्रतिनिधि मण्डलले उठाएका विषयहरुमा चासो लिदै त्यस विषयहरुप्रति नेपाल सरकार सकारात्मक रहेको जनाइएकाे छ । भेटघाट कार्यक्रममा उपाध्यक्ष नरेन्द भाट, उपाध्यक्ष दुर्गा आचार्य, महासचिव डा. केशव पौडेल, उपमहासचिव नारायण काफ्ले, मध्यपूर्वका क्षेत्रीय उपसंयोजक अमित राई, एनसिसि पोर्चुगलका प्रतिनिधि नरेन्द्र हमाल लगायतका गैरआवासीय नेपालीहरुको सहभागीता रहेको थियो ।

गैरआवासीय नेपाली संघले यही आउने १६ जुन २०२२ का दिन गैरआवासीय नेपाली नागरिकता, गैरआवासीय नेपालीहरुको लगानी, वैदेशिक रोजगार लगायत विषयमा एक दिने कार्यशाला प्रत्यक्ष तथा जुम प्रविधिमार्फत आयोजना हुन गईरहेको छ ।

कार्यक्रममा सहभागीताका लागि नेपाल सरकार सम्बन्धित मन्त्रालयहरु, राजनैतिक दलहरु र सरोकारवालाहरु संग भेटघाटको क्रम रहेको पनि सचिवालयले जनाएको छ ।