हामी सबैकाे संसारन्यूज

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले जनार्दन शर्माले अर्थमन्त्रीबाट राजीनामा दिएर नैतिकता र त्यागको सन्देश दिएका बताएका छन् । बिहीबार केन्द्रीय समिति बैठकलाई सम्बोधन गर्दै अध्यक्ष प्रचण्डले शर्माले आफूले केही नगरेको बताएको र त्यसबाट सकारात्मक सन्देश गएको बताएका हुन् ।

“उहाँले आफूले केही गरेको छैन भन्नुभएको छ तर, राजीनामा गर्नुभयो”, उनले भने “त्यसले नैतिकता र त्यागको सन्देश गएको छ । संसद्‍मा कुरा उठेपछि उहाँले प्रस्ट कुरा राखेर संसद्‍मा नैतिकता प्रदर्शन गर्नुभएको छ ।”

राजीनामा नदिएको भए यसै विषयलाई उचाल्दै गठबन्धनलाई नै अप्ठ्यारोमा पार्ने षड्यन्त्र भएको प्रचण्डको भनाइ छ। “राजीनामा नगरेको भए त्यै विषयलाई भ्रमित पार्दै र उचाल्दै राजनीति अप्ठ्यारोमा पार्ने र गठबन्धन अप्ठ्यारोमा पार्ने ठूलो डिजाइन भयो, त्यो डिजाइनलाई त्यागद्वारा जवाफ दिइएको छ”, उनले भनेका छन् ।

जनार्दन शर्माले त्याग गरेर षड्यन्त्रमा लागेकाहरूलाई जवाफ दिएको भन्दै प्रचण्डले माओवादी कार्यकर्ताले जनतामा प्रचार गराउनुपर्ने बताए ।