हामी सबैकाे संसारन्यूज

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र चिनियाँ कम्युनिस्ट पार्टीका विदेश विभाग प्रमुख लिउ जियन्चओबीच भेटवार्ता भएको छ । चार दिने भ्रमणका क्रममा आइतबार नेपाल आएका विदेश विभाग प्रमुख लिउ प्रचण्डलाई भेट्न सोमबार उनकै निवास खुमलटार पुगेका थिए ।

दुई नेताबीच नेपाल–चीन आपसी हितका साथै चिनियाँ कम्युनिष्ट पार्टी र माओवादी केन्द्रको सम्बन्धलगायतबारे छलफल भएको प्रचण्डको सचिवालयले जनाएको छ ।

चिनियाँ टोलीसँगको भेटवार्तामा माओवादी केन्द्रका नेताहरू नारायणकाजी श्रेष्ठ, कृष्णबहादुर महरा, वर्षमान पुन, देव गुरुङ, पम्फा भुसाल पनि सहभागी थिए ।

चिनियाँ विदेश विभाग प्रमुख लिउले यसअघि प्रधानमन्त्री शेरबहादुर देउवा, परराष्ट्रमन्त्री डा. नारायण खड्का लगायतसँग भेट गरिसकेका छन् । मंगलबार लिउले एमाले अध्यक्ष केपी शर्मा ओलीसँग भेटवार्ता गर्ने कार्यक्रम छ ।