हामी सबैकाे संसारन्यूज

काठमाडौं । नेकपा (एमाले)का अध्यक्ष केपी शर्मा ओलीले गठबन्धन कायम रहनु हानिकारक हुने बताएका छन् । सोमबार सम्पादकहरुसँगको अन्तरक्रियामा उनले गठबन्धन निष्प्राण भइसकेको भन्दै बोकेर हिडिँरहे समाजमा हैजा फैलिने बताए ।

उनले भनेका छन्, “यो गठबन्धन मृत भइसक्यो । यस्तो गठबन्धन बोकेर हिँडेर काम लाग्दैन । अब सतीदेवीको जस्तो अंग झर्दै जान्छ । अस्ती एउटा अंग झर्‍यो । यसको अ‌ंग झरेको ठाँउमा कुनै पीठ बन्दैन । त्यसैले यो परमादेशी सरकारको कुनै अर्थ छैन ।”

गठबन्धनमा रहेका दलहरूका अनेकका स्वार्थ मात्रै रहेको भन्दै उनले यसको कुनै गन्तव्य नरहेको बताए ।

“अनेकका अनेक स्वार्थ छन्, उद्देश्य र गन्तव्य छैन, सुशासन, विकास हुनुपर्छ भन्ने एजेण्डामा एमाले अघि बढेको छ र अर्को पोल गठबन्धन टिकाउने र लुटपाट र हाटहुट गर्नुपर्छ भन्ने मात्रै शक्ति छ”, उनले भने ।

ओलीले मुलुक चुनावका प्रवेश गरिसकेको भन्दै सरकारको काम नभएको टिप्पणी गरे ।