हामी सबैकाे संसारन्यूज

काठमाडौं । सिटिजन्स बैंक इन्टरनेश्नलले खुद मुनाफामा वृद्धि गरेको छ । बैंकले अघिल्लो आर्थिक वर्षको तुलनामा २४.७६ प्रतिशतले खुद मुनाफामा वृद्धि गरेको वित्तीय विवरण सार्वजनिक गरेको हो ।

बैंकले सार्वजनिक गरेको वित्तीय विवरणअनुसार बैंकको खुद मुनाफा १ अर्ब ८० करोडबाट बढेर गत आर्थिक बर्ष २ अर्ब २५ करोड पुगेको छ । जसमा १ अर्ब ४६ करोड रुपैयाँ वितरण योग्य मुनाफा रहेको छ ।

यस अवधिमा बैंकको निक्षेप ८.६५ प्रतिशतले बढेर १ खर्ब ५२ अर्ब पुगेको छ भने कर्जा लगानी १०.६८ प्रतिशतले बढेर १ खर्ब ३१ अर्ब पुगेको बैंकले जनाएकाे छ ।

त्यस्तै यस अवधिमा बैंकको मुख्य आम्दानीको रुपमा लिईने आम्दानी खुद ब्याज आम्दानी ४०.२९ प्रतिशतले बढेर ५ अर्ब १२ करोड पुगेको बैंकले जनाएकाे छ । यस अवधिमा बैकंको चुक्तापुंजी १४ अर्ब २० करोड रहेको छ भने रिजर्भ एण्ड सरप्लसमा ६ अर्ब ४४ करोड रहेको छ । त्यस्तै बैंकको खराब कर्जा अनुपात १.८७ प्रतिशत रहेको बैंकले जनाएकाे छ ।

त्यस्तै यस अवधिमा बैंकको प्रति सेयर आम्दानी १५ रुपैयाँ ८५ पैसा, प्रति सेयर नेट वर्थ १४५ रुपैयाँ ३९ पैसा र मुल्य आम्दानी अनुपात १२.७७ गुणा रहेको बताइएकाे छ ।