हामी सबैकाे संसारन्यूज

काठमाडौं । माछापुच्छ्रे बैंक लिमिटेडले आन्तरिक राजस्व विभागसँगको सहकार्यमा सञ्चालन भइरहेको ‘करदाता प्रोत्साहन उपहार कार्यक्रम’मा ग्राहकलाई सहभागी गराउन ‘एम–स्मार्ट’ मोबाइल बैंकिङमार्फत डिजिटल भुक्तानी गर्न आग्रह गरेको छ ।

नेपाल सरकारको आर्थिक वर्ष २०८३/८४ को बजेटअनुसार आन्तरिक राजस्व विभागले बिल लिने संस्कृतिको विकास, डिजिटल भुक्तानीको प्रवद्र्धन र कर प्रणालीलाई पारदर्शी बनाउने उद्देश्यले करदाता प्रोत्साहन उपहार कार्यक्रम सञ्चालन गरेको हो ।

कार्यक्रमअन्तर्गत योग्य कारोबार गर्ने ग्राहकले दैनिक १ लाख रुपैयाँसम्म र प्रत्येक १५ दिनमा १० लाख रुपैयाँसम्मको पुरस्का जित्ने अवसर पाउने व्यवस्था गरिएको छ ।

माछापुच्छ्रे बैंकका ग्राहकले बैंकको स्मार्ट मोबाइल बैंकिङ एपमार्फत  Bill Jitau (IRD) मेनुमा गई कार्यक्रमका लागि योग्य कारोबार गर्न सक्ने बैंकले जनाएको छ ।

कार्यक्रममा सहभागी हुन ग्राहकले १०० रुपैयाँभन्दा बढीको वस्तु वा सेवा खरिद गरी माछापुच्छ्रे बैंकको मोबाइल बैंकिङ वा Merchant QR डिजिटल भुक्तानी गर्नुपर्नेछ ।

यस्तो कारोबार आन्तरिक राजस्व विभागको प्रणालीमा समेत समावेश हुनुपर्ने बैंकले जनाएको छ । ग्राहकले डिजिटल भुक्तानी गर्दा PAN/VAT बिल अनिवार्य रूपमा लिन र सुरक्षित राख्न बैंकले आग्रह गरेको छ ।

बैंकका अनुसार ग्राहकले एम–स्मार्टको ‘Bill Jitau IRD’ मेनुमार्फत आफ्नो कारोबार कार्यक्रमका लागि योग्य भए/नभएको जानकारीसमेत हेर्न सक्नेछन् ।

बैंकले डिजिटल भुक्तानीलाई प्रोत्साहन गर्दै बिल लिने बानीको विकास र औपचारिक कारोबार विस्तारमा सहयोग पुर्‍याउने उद्देश्यले उक्त  कार्यक्रमलाई ग्राहकसम्म पुर्‍याएको जनाएको छ ।