हामी सबैकाे संसारन्यूज

काठमाडौं । माछापुच्छ्रे बैंकको नाफा २ अर्ब १६ करोड ९ लाख रुपैयाँ भएको छ । बैंकको वित्तीय विवरणअनुसार अघिल्लो आर्थिक वर्षको तुलनामा गत आर्थिक वर्षको नाफा ३४.३४ प्रतिशतले बढेको हो ।

बैंकको अघिल्लो आर्थिक वर्षको नाफा १ अर्ब ६० करोड रुपैयाँ रहेको थियो । बैंकको प्रतिसेयर आम्दानी २१ रुपैयाँ ०७ पैसा पुगेको छ ।

बैंकको चुक्ता पुँजी ९ अर्ब ५ करोड ३१ लाख रुपैयाँ छ । बैंकको वित्तीय विवरणअनुसार बैंकको सेयरधनी सञ्चित कोषमा १ अर्ब ३२ करोड ८४ लाख रुपैयाँ छ भने जगेडा कोषमा ३ अर्ब ३२ करोड ४६ लाख रुपैयाँ पुगेको हो ।

गत आर्थिक वर्षमा बैंकको निक्षेप एक खर्ब ३१ अर्ब ६१ करोड ८० लाखबाट १० दशमलव १९ प्रतिशतले वृद्धि भई एक खर्ब ४५ अर्ब २ करोड ६० लाख रुपैयाँ पुगेको छ । बैंकको कर्जा लगानी एक खर्ब १३ अर्ब ५७ करोड २० बाट १३.०४ प्रतिशतले बढेर एक खर्ब २८ अर्ब ५६ करोड २३ लाख रुपैयाँ पुगेको देखिएको हो ।

यस अवधिमा बैंकको खुद ब्याज आम्दानी १६ दशमलव ६७ प्रतिशतले वृद्धि भएर ५ अर्ब ७ करोड ७० लाख पुगेको छ । बैंकको निष्क्रिय कर्जा ०.६२ प्रतिशतबाट बढेर ०.८४ प्रतिशत पुगेको छ ।