हामी सबैकाे संसारन्यूज

काठमाडौं । पूर्वअर्थमन्त्री जनार्दन शर्मामाथि छानबिन गर्न गठित विशेष संसदीय समितिले नेपाल प्रहरीको केन्द्रीय प्रहरी विधि विज्ञान प्रयोगशालाले ‘रिकभर’ गरी उपलब्ध गराएको सीसीटीभी फुटेज हेरेको छ । मंगलबार बसेको समितिको बैठकमा प्रहरीले उपलब्ध गराएको भिडियो फुटेज हेरिएको हो ।

तर, रिकभर गरिएको सीसीटीभीको भिडियो फुटेज बुझ्ने खालको नभएको भन्दै पुनः विज्ञलाई बोलाइने निर्णय भएको छ । समितिका एक सदस्य एवम् कांग्रेस सांसद सिताराम महतोका अनुसार भिडियोबारे आजको बैठकले विज्ञ समूह बोलाउने निर्णय गरेको हो ।

“सीसीटीभी फुटेज रिकभर भएको छ, जुन रिकभर भिडियो के हो भन्नेबारे विज्ञ आएपछि मात्रै थाहा हुन्छ”, महतोले संसार न्यूजसँग भनेका छन्, “आजको बैठकले विज्ञ बोलाउने निर्णय गरेको छ । विज्ञ आएपछि मात्रै फुटेज के हो भन्न सकिन्छ ।”

महतो हेरिएको भिडियो के–कस्तो थियो भन्नेबारे जानकारी नगराएपनि भिडियो स्पष्ट नभएकै कारण समितिले पुनः विज्ञ टोली बोलाउने निर्णय गरेको हो । “धेरै भिडियो छन्, कुन दिनको केहो स्पष्ट भइसकेको छैन, प्राविधिकले भन्ने विषय हो”, उनले भनेका छन् ।

प्रहरीले सोमबार नै समितिलाई रिकभर गरिएको भिडियो फुटेज उपलब्ध गराएको थियो । भिडियो फुटेज नबुझिने भएसँगै एमालेबाट प्रतिनिधित्व गर्ने समितिका सदस्यहरुले सोमबारको बैठकमै पूर्वअर्थमन्त्री शर्माको मोबाइलको कल डिटेल हेर्नुपर्ने माग राखेका थिए । तर, व्यक्तिको गोपनीयताको हक हनन् हुने भन्दै अन्य सांसदहरुले भने त्यतातिर जान नहुने तर्क गरेका छन् ।

बजेट निर्माणका क्रममा अनाधिकृत व्यक्तिको प्रवेश गराई करको दर हेरफेर गरिएको विषय बाहिरिएपछि पूर्वअर्थमन्त्री शर्मामाथि छानबिन गर्न असार २२ मा संसदीय छानबिन समिति गठन भएको थियो । असार २२ मा गठन भएको समितिले असार २८ देखि कार्य थालेको थियो ।

कार्य थालनीदेखि १० दिनसम्मको समय पाएको समितिलाई समय अपुग भएको भनेपछि संसदले गत असार ५ मा थप एक साताको लागि समय थप गरेको थियो । तर, थपिएको समयमा पनि समितिले छानबिनमा प्रगति भने गर्न सकेको छैन ।

सम्बन्धित समाचार

करको दर हेरफेर प्रकरण : तथ्य नभेटाएपछि छानबिन समितिलाई थपियो एक साता

करको दर हेरफेर प्रकरण : कहाँ पुग्यो छानबिन ?