हामी सबैकाे संसारन्यूज

काठमाडौं । अमेरिकी सहायक विदेशमन्त्री डोनाल्ड लु बिहीबार नेपाल भ्रमण आउने भएका छन् । लु तीन दिने भ्रमणका क्रममा काठमाडौं आउन लागेको परराष्ट्र मन्त्रालय स्रोतले जनाएको छ ।

नेपालमा रहँदा लुले उच्च राजनीतिक भेटवार्ता गर्ने छन् । बिहीबार साँझ आउने उनले सुरुमा प्रधानमन्त्री शेरबहादुर देउवालाई भेट्ने कार्यक्रम छ ।

लु यसअघि ०७८ मंसिर १ मा नेपाल भ्रमणमा आएका थिए । उनको भ्रमण पछि नै नेपालको संसदले एमसीसीलाई व्याख्यात्मक घोषणासहित पारित गरेको थियो । एमसीसी अनुमोदनमा मुख्य भूमिका खेलेका लुको पछिल्लो भ्रमणलाई अर्थपूर्णं रुपमा हेरिएको छ ।

यतिबेला एकातिर नेपालले अमेरिकी सैन्य कार्यक्रम एसपीपी अस्वीकार गर्ने निर्णय गरेको छ भने अर्कोतिर प्रधानमन्त्री शेरबहादुर देउवाको यसअघि तय भएको अमेरिका भ्रमण रद्द भएको छ । असार अन्तिम साता मात्रै चिनियाँ उच्च अधिकारीको नेपाल भ्रमण भएको थियो । राजनीतिक रुपमा भएको त्यो भ्रमण पछि अमेरिकाको तर्फबाट भएको यो पहिलो उच्च भ्रमण हो ।

नेपालले एसपीपी अस्वीकार गर्ने निर्णय गरेको भएपनि औपचारिक रुपमा अमेरिकालाई पत्र पठाएको छैन । लुको भ्रमण एसपीपी कार्यान्वनय र देउवाको भ्रमणबारे केन्द्रीत हुनसक्ने बुझ्न सकिन्छ ।