Sansar News
काठमाडौं । ताइवान नजिकै चलिरहेको सैन्य अभ्यासको दोस्रो दिन चिनियाँ लडाकु विमानहरू ताइवानको आकाशमा प्रवेश गरेका छन्। ताइवानको रक्षा मन्त्रालयले भनेअनुसार २० चिनियाँ लडाकु विमान र १० युद्धपोतले शुक्रबार बिहान ताइवान स्ट्रेटको मध्य रेखा पार गरेका थिए ।
उनीहरूले जानाजानी ताइवान स्ट्रेट पार गर्न खोजिरहेको ताइवानको रक्षा मन्त्रालयले भनेको छ । “हामीले सावधानीका रूपमा मिसाइल प्रणाली तैनाथ गरेका छौं, हामीले चीनको गतिविधिलाई निरन्तर निगरानी गरिरहेका छौं, केही विमान र जहाजलाई अनुगमनका लागि पठाइएको छ”, ताइवानको रक्षा मन्त्रालयले भनेको छ ।
वास्तवमा अमेरिकी संसदकी सभामुख न्यान्सी पेलोसीको ताइवान भ्रमणलाई लिएर चीन र ताइवानबीचको विवाद बढेको छ । पेलोसी अगस्ट २ मा ताइवान पुगेकी थिइन् । उनी फर्कने बित्तिकै चीनले अगस्ट ४ मा ताइवाननजिकै सैन्य अभ्यास सुरु गरेको थियो ।
पेलोसीमाथि प्रतिबन्ध
चीनले न्यान्सी पेलोसीमाथि प्रतिबन्ध लगाएको छ । तर, चीनले कस्तो किसिमको प्रतिबन्ध लगाएको हो भन्ने स्पष्ट छैन ।
चीनको विदेश मन्त्रालयले पेलोसीलाई एक चीन नीतिको उल्लंघन गरेको बताएको छ । “हाम्रो विरोधका बाबजुद पेलोसीले ताइवानको भ्रमण गरिन्, यो हाम्रा लागि गम्भीर विषय हो”, विदेशमन्त्री वाङ यीले भनेका छन्, “अमेरिकी संसदका सभामुखले हाम्रो आन्तरिक मामिलामा हस्तक्षेप गरेकी छिन्, उनले एक चीन नीतिको उल्लंघन गरेकी छिन्, चीनको विरोधका बाबजुद पेलोसीले ताइवानको भ्रमण गरेर क्षेत्रको शान्तिलाई खतरामा पारेकी छिन् ।”
जापान पुगेर चीनको विरोध
यसैबीच, न्यान्सी पेलोसी ताइवानको भ्रमण सकेर जापान पुगेकी छिन् । उनले चिनियाँ सैन्य अभ्यासको निन्दा गरेकी छिन् । पेलोसीले भनिन्, “चीनले अमेरिकी अधिकारीहरूलाई ताइवान यात्रा गर्नबाट रोकेर ताइवानलाई अलग गर्न सक्दैन। हामी ताइवानलाई एक्लो हुन दिनेछैनौं। अमेरिकाले चीनलाई यसो गर्नबाट रोक्नेछ।” एजेन्सीबाट
सम्बन्धित समाचार
चीन र ताइवानबीच बढ्यो युद्धको सम्भावना, अहिलेसम्मकै ठूलो सैन्य अभ्यासमा देखियो चीन
चीन र ताइवानबीच युद्धको सम्भावना : नेपालमा कस्तो पर्ला असर ?
वि.सं.२०७९ साउन २० शुक्रवार १५:३९ मा प्रकाशित
