हामी सबैकाे संसारन्यूज

स्टकहोम । स्विडेनमा जन्मदर अत्यन्त न्यून भएको तथ्याङ्क सार्वजनिक भएको छ ।

सन् २०२२ को पहिलो छ महिनाको जन्मदर हेर्दा १६ वर्ष पछिकै सबैभन्दा कम जन्मदर देखिएको हो ।

स्विडेनको तथ्याङ्क अधिकारीहरूले औपचारिक रूपमा बिहीबार दिएको जानकारीअनुसार यस अवधिमा ५४ हजार छ सय ५० जना जन्मिएका छन् । यो सङ्ख्या अघिल्लो वर्षको यही अवधिको तुलनामा छ दशमलव सात प्रतिशत कम हो ।

उनले सन् २००६ पछिकै सबैभन्दा कम जन्मदर यसवर्षको अघिल्लो छ महिनामा देखिएको जानकारी दिए ।

स्विडेनका जनसङ्ख्या शास्त्री टोमस जोनसनले यसवर्षका हरेक महिना अघिल्लो वर्षका हरेक महिनाभन्दा कम जन्मदर देखिएको बताए ।

जन्मदर घट्नुको पछाडि धेरै कारण हुनसक्ने विज्ञहरूको भनाइ छ । प्राध्यापक गुनार अन्डेर्सन जन्मदर घट्नुलाई विभिन्न तरिकाले हेर्न सकिने बताउँछन् ।

सामन्यतयाः कोरोना भाइरसको महामारी, कोरोना भाइरस विरुद्धको खोप अभियान, आर्थिक सङ्कटलगायतका कारण मुख्य कारण हुनसक्ने उनको बुझाइ छ ।

गत जुन ३० सम्मको तथ्याङ्कअनुसार स्विडेनको अहिलेको कूल जनसङ्ख्या एक करोड चार लाख ८७ हजार आठ सय ५९ रहेको छ । (रासस/सिन्ह्वा)