हामी सबैकाे संसारन्यूज

काठमाडाैं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले बुधवारसम्म सिट बाँटफाँट टुंगो लगाउने बताएका छन् । मंगलवार धनगढीमा पत्रकारहरूसँग कुरा गर्दै प्रचण्डले मंगलवार दिनभर कार्यदललाई काम गर्न जिम्मा दिइएको र बुधवार शीर्ष नेताहरू बसेर त्यसलाई टुंगोमा पुर्‍याउन लागिएको बताए ।

‘सिट संख्या र निर्वाचन क्षेत्र एकैपटक टुंगो लगाउने भनेर लागिरेहका छौं । सबै पार्टीका साथीहरू लागिरहनुभएको छ । कार्यदललाई आजसम्मको समय दिइएको छ । भोलि शीर्ष नेताहरू बसेर त्यसलाई टुंगो लगाउने भनेका छौं,’ प्रचण्डले भने ।

प्रचण्डले कांग्रेसले ८० सिट वरिपरिको संख्यामा सहमतिमा आउने बताएका छन् । उनले कांग्रेस सयबाट ८० मा आउने सम्भावना बढ्दो रहेको पनि बताए ।

‘नेपाली कांग्रेसले चर्चा चलिरहेको र उहाँहरुले सुरुमा १०० भन्नुभएको थियो । तपाईहरुले पनि सुन्नुभएकै होला’, प्रचण्डले भने, ‘तर पछि ८० को वरिपरि आउने सम्भावना बढ्दो छ । हामीले पनि ६० भनेका छौं, ६० बाट केही तलमाथि होला तर त्यसैको वरिपरि हुन्छ भन्ने हाम्रो विश्वास छ ।’

त्यसैगरी नेकपा एकीकृत समाजवादी र नेसपाले पनि २५ सिटको वरिपरि गरेको स्थिति भएकाले त्यसैलाई आधार बनाएर सवै पार्टीका प्रतिनिधिहरु बसेर क्षेत्र र प्रदेशसम्म हेरेर टुंग्याउने प्रयासमा रहेको बताए ।