हामी सबैकाे संसारन्यूज

काठमाडौं । सर्वोच्च अदालतका चार पूर्वप्रधानन्यायाधीशहरू प्रतिनिधिसभाको महाभियोग सिफारिस समितिले बोलाएको छलफलमा नजाने भएका छन् । समितिले बिहीबार दिउँसो १ बजेका लागि पूर्वप्रधानन्यायाधीहरू मीनबहादुर रायमाझी, अनुपराज शर्मा, कल्याण श्रेष्ठ र सुशीला कार्कीलाई छलफलका लागि बोलाएको थियो ।

निलम्बित प्रधानन्यायाधीश चोलेन्द्र शमशेर राणाले समितिलाई दिएको बयानका क्रममा पूर्वन्यायाधीहरूले पनि सर्वोच्चलाई दबाब दिने गरेको, आफूलाई मुद्दाको सुनुवाइमा दबाब दिएको लगायतका आरोप लगाएका थिए। राणाको आरोपलाई लिएर समितिले पूर्वप्रधानन्यायाधिशलाई छलफलका लागि बोलाएको थियो ।

तर, उनीहरुले समितिमा उभिएर आफूहरुले बयान दिन उपयुक्त नहुने भएकाले समितिलाई सम्मान गर्दै नजाने निर्णय गरेको पूर्वप्रधानन्यायाधीश अनुपराज शर्माले बताएका छन् ।

राणाले बयानका क्रममा नाम लिएका ६ न्यायाधीश र ४ पूर्वप्रधानन्यायाधीशलाई समितिले सोधपुछका लागि बोलाउने निर्णय गरेको थियो । समितिले बोलाएको पत्र पाएपछि बुधबार अपराह्न साढे ४ बजे सर्वोच्चका सबै न्यायाधीश सम्मिलित फुलकोर्ट बसेको थियो । फुलकोर्टले न्यायाधीशहरूलाई महाभियोग सिफारिस समितिमा उपस्थित गराएर सवालजवाफ गर्नु संवैधानिक मान्यताविपरीत हुने ठहर गरेको थियो ।

सर्वोच्च अदालतका कामु मुख्य रजिस्ट्रार नारायण पन्थीले फुलकोर्टको उक्त निर्णय बुधबार नै महाभियोग सिफारिस समितिलाई पठाइदिएका छन् ।