Sansar News
काठमाडौं । दराज अनलाइनले अब डेलिभरीको लागि विद्युतीय बाइकको प्रयोग गर्ने भएको छ । कम्पनीले काठमाडौं उपत्यकामा डेलिभरी गर्न ओकिनावा डुअल इलेक्ट्रिक बाइक खरिद गरेको जनाएको छ ।
विशेषगरी धुम्बाराही, चाबहिल, कपन, कुलेश्वर, कालीमाटी, न्युरोड, नागार्जुन, पुलचोक, सानेपा, जावलाखेललगायतका केही क्षेत्रका ग्राहकलाई सामान पु¥याउन विद्युतीय बाइकको प्रयोग गरिने उल्लेख छ ।
यस नयाँ पहलमार्फत, दराजले आयातित इन्धनको खपतलाई स्वदेशमै उत्पादन हुने “क्लिन एण्ड ग्रिन” बिजुलीले प्रतिस्थापन गर्ने र वातावरणमा कार्बन फुटप्रिन्ट कम गर्ने अपेक्षा गरेको छ । साथै, कम्पनीले दुई र चार पाङ्ग्रे दुवै खण्डमा आफ्नो फ्लीटमा विद्युतीय सवारी साधनको संख्यालाई थप विस्तार गर्ने योजना रहेको पनि बताएको छ ।
दराजकी प्रबन्ध निर्देशक आँचल कुँवर भन्छिन्, “यो दराजमा दिगो तथा वातावरण मैत्री सञ्चालनतिरको थप एक कदम हो । हाम्रा डेलिभरी सवारी साधनहरूमा १० वटा विद्युतीय स्कुटरहरू थपिएका छन् ।”
उनले अगाडि थपेकी छिन्, “हामी हरियाली नेपाल निर्माण गर्न मद्दत गर्ने उपायहरू कार्यान्वयन गर्न सधैं अग्रसर रहनेछौँ ।”
सेप्टेम्बर २३ मा दराजको थसिखेल हबमा आयोजित कार्यक्रममा दराज नेपालकी प्रबन्ध निर्देशक कुँवरले कम्पनीका गोपी कृष्ण, सोल्टीमोड र थसिखेल हबका डेलिभरी हिरोहरुलाई विद्युतीय बाइकको साँचो हस्तान्तरण गरेकी थिइन् ।
वि.सं.२०७९ असोज १० सोमवार ०८:४१ मा प्रकाशित
