हामी सबैकाे संसारन्यूज

काठमाडौं । १ लिटर (बोतल) पानीको अधिकतम १६ रुपैयाँभन्दा बढी नलिन वाणिज्य आपुर्ति तथा उपभोक्ता संरक्षण विभागले निर्देशन दिएको छ ।

विभागले तोकिएको मूल्यभन्दा बढी रकम असुलेको पाएपछि व्यावसायीलाई बोलाएर सम्झाएको हो । काठमाडौं उपत्यकाभित्र खानेपानी १ लिटर बोतलको १६ रुपैयाँ, २० लिटर जारको ४७ रुपैयाँ तोकिएको छ ।

व्यवसायीले भने मनलाग्दी बोतलको पानीको २० देखि ३० रुपैयाँसम्म असुल गर्दै आएका छन् । यस्तै जारको पानीमा ५० देखि ६० रुपैँया असुल गर्दै आएका छन् ।

विभागले सोमबार पानी उत्पादक तथा बिक्रेताहरुलाई बोलाएर मनलाग्दी पानी बिक्री नगर्न भनेको थियो ।

यस्तै व्यावसायीहरुले २० लिटरको जार भनी १९ लिटरको जार बनाएर बिक्री गर्ने गरेको पनि देखिएको छ । पानीको गुणस्तर पुगे÷नपुगेको जारको गुणस्तर भए÷नभएको विषयमा विभागले अनुगमन समेत सुरु गर्ने भएको छ । पानीको मूल्य र गुणस्तको विषयमा विभाग गम्भिर बनेको विभागका महानिर्देशक महेश भट्टराईले बताए । महानिर्देशक भट्टराईले भने ‘पानीको मूल्य र गुणस्तरको विषयमा व्यावसायीहरुलाई सजग बनाएका छौं, यससँगै अनुगमनलाई पनि अघि बढाउने तयारी गरेका छौं ।’

पानीको मूल्यको विषयमा उद्योग तथा वाणिज्य र श्रम तथा उपभोक्ता हित समितिले अध्ययन गरी पानीको मूल्य तोकि लागू गर्न निर्देशन दिएको छ । सो मूल्य लागू गर्न विभागले आग्रह गरेको हो । जसअनुसार उपत्यका बाहिर १ लिटर बोतलको २० रुपैयाँ र २० लिटर जारको ६० रुपैयाँ तोकिएको छ ।