Sansar News
काठमाडौं । लगातार चौथो कारोबार दिन पनि सेयर बजारमा गिरावट भएको छ । साताको अन्तिम कारोबार दिन बिहीबार नेप्से २३.५२ अंकले घटेर १८९३.७० बिन्दुमा पुगेको छ । बजार घटेसँगै ठूला कम्पनीको कारोबार मापन गर्ने सेन्सेटिभ इन्डेक्स पनि ४.१७ अंकले घटेर ३७२.३७ बिन्दुमा ओर्लिएको छ ।
बिहीबार सबै उपसूचकमा गिरावट हुँदा कारोबार रकम पनि घटेकाे छ । बिहीबार नेप्सेमा ३१ लाख १४ हजार ६८९ कित्ता सेयर किनबेच हुँदा १ अर्ब ११ करोड ९४ लाख ६१ हजारको कारोबार भएको छ ।
जसमध्ये शिवम् सिमेन्टको सर्वाधिक १० करोड २२ लाख ३५ हजारको कारोबार हुँदा नेपाल पुनर्बीमा कम्पनीको ३ करोड ५८ लाख २६ हजार र युनाइटेड मोदी हाइड्रोपावरको ३ करोड ३४ लाख ६६ हजारको कारोबार भएको छ ।
आज कारोबारमा आएका २२६ वटा कम्पनीमध्ये १३ वटा कम्पनीको शेयर मूल्य बढेको छ भने १७१ वटा कम्पनीको मूल्य घटेको छ । बिहीबार कारोबार भएकामध्ये मन्दाकिनी हाइड्रोपावरको सेयर मूल्य ३.९२ प्रतिशतले वृद्धि हुँदा सिन्धु विकास बैंकको २.७७ प्रतिशत र हिमालयन पावर पार्टनर कम्पनीको सेयर मूल्य १.७८ प्रतिशतले वृद्धि भएको छ ।
अपर हेवाखोला जलविद्युत कम्पनीको सेयर मूल्य ६.९१ प्रतिशतले गिरावट हुँदा किसान लघुवित्त वित्तीय संस्थाको ५.७८ प्रतिशत र पञ्चकन्यामाइ हाइड्रोपावरको सेयर मूल्य ५.२५ प्रतिशतले गिरावट भएको छ ।
वि.सं.२०७९ कात्तिक २४ बिहीवार १६:०१ मा प्रकाशित
