हामी सबैकाे संसारन्यूज

बेइजिङ । चीनले संयुक्त राज्य अमेरिकालाई चिनियाँ अधिकारीहरूमाथि लगाइएका तथाकथित प्रतिबन्धहरू तत्काल फिर्ता लिन र तिब्बतको मामिलामा हस्तक्षेप गर्न बन्द गर्न आग्रह गरेको छ ।

परराष्ट्र मन्त्रालयका प्रवक्ता वाङ वेनबिनद्वारा जारी विज्ञप्तिमा सो आग्रह गरिएको हो । अमेरिकाले शुक्रबार दुई वरिष्ठ चिनियाँ अधिकारीहरूलाई तिब्बत स्वायत्त क्षेत्रमा गम्भीर मानवअधिकार हनन गरेको भन्दै प्रतिबन्ध लगाएपछि परराष्ट्र मन्त्रालयको यस्तो टिप्पणी आएको हो ।

वाङले अमेरिकी पक्षले घरेलु कानुन र तिब्बतमा तथाकथित मानवअधिकार मुद्दाहरूको बहानामा चिनियाँ अधिकारीहरूमाथि गैरकानुनी प्रतिबन्ध लगाएको बताएका छन् । यसबाट चीनको आन्तरिक मामिलामा हस्तक्षेप भएको र अन्तरराष्ट्रिय सम्बन्धका आधारभूत मान्यताहरूमाथि नै गम्भीर उल्लङ्घन भएको बुझाइ चीनको छ ।

“चीनले यसको दृढतापूर्वक विरोध गर्दछ र यसको कडा निन्दा गर्दछ,” वाङले भने ।

उनले अमेरिकालाई अन्य देशहरूविरुद्ध अनावश्यक प्रतिबन्ध लगाउने अधिकार नरहेको भन्दै कुनै पनि देश “विश्व प्रहरी” को रूपमा काम गर्ने स्थितिमा नरहेको पनि उनको टिप्पणी छ ।

प्रवक्ताले आफ्नो वैध अधिकार र हितको रक्षा गर्न चीनले प्रभावकारी र दृढतापूर्वक कदम चाल्ने पनि बताएका छन् । (रासस\सिन्ह्वा)