हामी सबैकाे संसारन्यूज

काठमाडौं । प्रतिनिधिसभा सदस्यका रुपमा सपथ ग्रहण गरेकै दिनदेखि प्रतिनिधिसभा सदस्यले राज्यबाट सेवा सुविधा पाउने गर्दछन् । संघीय संसद सचिवालयका प्रवक्ता रोजनाथ पाण्डेका अनुसार सपथकै दिन सांसदहरुले कानुनको संग्रह, डायरी, झोला, कलम, सपथ राख्ने फाइल पाउनेछन् ।

सांसद आफुँले त तबल भत्ता पाउँछन् नै निजी सचिवालयका लागि पनि सुविधा पाउनेछन् । नयाँ सांसदले कोठा व्यवस्थापन गर्न सुरुमै फर्निचर वापतको रकमसमेत पाउनेछन् ।

सांसदलाई मासिक रुपमा अतिथि सत्कार गर्नसमेत राज्यले पैसा भुक्तान गर्दछ । प्रवक्ता पाण्डेका अनुसार सांसदले मासिक रुपमा एक हजार अथिति सत्कार गर्नको निम्ति पैसा पाउनेछन् ।

सांसदहरूले तलबबापत मासिक ६६ हजार ७० रुपैयाँ पाउनेछन् । काठमाडौं उपत्यकामा घर नभएका सांसदले घरभाडाबापत मासिक १८ हजार रुपैयाँ पाउने छन् । घर हुने सांसदले भने घर मर्मतसम्भारबापत मासिक ८ हजार रुपैयाँ पाउँछन् ।

त्यस्तै, बिजुली, पानी, इन्टरनेट, टेलिफोन महसुल र पत्रपत्रिकाबापत मासिक ३ हजार रुपैयाँ पाउनेछन् । इन्टरनेटसहित एउटा टेलिफोन लाइन जडान गर्न लाग्ने धरौटी तथा अन्य खर्च पनि सुरुमा पाउने व्यवस्था छ ।

त्यस्तै, बैठक बस्दा दैनिक १ हजार यातायात खर्च र १ हजार बैठक भत्ता पाउने व्यवस्था छ । सत्तापक्षका नेता, विपक्षी दलका नेता, प्रमुख सचेतक, सचेतक र संसदीय समितिका सभापतिले गाडी सुविधा पाउने व्यवस्था छ ।

सांसदले एक अधिकृत स्तरको स्वकीय सचिव राख्न पाउने व्यवस्था छ । जसअनुसार हालको तलबमानअनुसार ४३ हजार ६८८ रुपैयाँ खर्च हुन्छ ।

सांसदको स्वास्थ्य उपचार पनि सरकारले नै गर्ने व्यवस्था छ । अस्पताल भर्ना भएर गरिएको उपचार खर्च मात्र नभएर नियमित सेवन गर्ने औषधिसमेत सचिवालयले उपलब्ध गराउँछ ।

के–के पाउँछन् सुविधा ?

मासिक तलब : ६६ हजार ७० रुपैयाँ

बैठक भक्ता : २ हजार (यातायात भत्तासहित)

टेलिफोन, पत्रपत्रिका र इन्टरनेट : ३ हजार

आवास खर्च (काठमाडौंमा घर नहुनेलाई) : १८ हजार

घर मर्मत खर्च (काठमाडौंमा घर हुनेलाई): ९ हजार

बिजुली र पानी : २ हजार

अथिति सत्कार : १ हजार

फर्निचर : १५ हजार (सुरुमा एक पटक)

स्वीकय सचिव (अधिकृत स्तरको एक जना) : ४३ हजार ६८८