हामी सबैकाे संसारन्यूज

काठमाडौं । केही सञ्चार माध्यममा नयाँ बन्ने राष्ट्रपतिको विषयलाई लिएर अनेकन खालका अड्कलबाजीहरु भएका छन् । विशेषतः गैरराजनीतिक व्यक्ति राष्ट्रपति बन्ने चर्चा सञ्चार माध्यममा चलिरहेको छ ।

केही सञ्चार माध्यमले नामै किटेर पूर्वप्रधानन्याधीश खिलराज रेग्मीको चर्चा चलाएका छन् । राष्ट्रपति बन्न रेग्मी बुढानिलकण्ठदेखि बालुवाटार धाइरहेको चर्चा गरेका छन् ।

तर, चर्चामा आएको विषय कति सही हो स्पष्ट छैन । सोमबार रेग्मीबारे चलेको चर्चाबारे सञ्चारकर्मीले माओवादी केन्द्रका अध्यक्ष पुष्पकमल दाहाल ‘प्रचण्ड’लाई प्रश्न तेर्साएका थिए । चितवन पुगेका अध्यक्ष प्रचण्डलाई के गैरराजनीतिक व्यक्तिलाई राष्ट्रपति बनाउन लागिएको हो ? भनि सञ्चारकर्मीले प्रश्न गरेका थिए ।

तर, प्रचण्डले भने यो चर्चालाई स्पष्टरुपमै खण्डन गरेका छन् । उनले गैराजनीतिक व्यक्ति राष्ट्रपनि हुने सम्भावना नरहेको स्पष्ट पारेका छन् ।

“ कतिपय बुद्धिजिवी साथीले सुझाव दिएको हो, तर त्यो अब सम्भव छैन, कुरा टुंगीसकेको छ”, प्रचण्डले भनेका छन्, “हामीले यसलाई छलफलको विषयसमेत बनाएका छैनौ ।”

प्रचण्डले गठबन्धनकै नेतृत्वमा सरकार बन्ने र प्रधानमन्त्री आलोपालो हुने सम्भावना बढी रहेको बताए । तथापी, एमालेसँग पनि संवादमै रहेको उनले प्रष्ट्याएका छन् ।