हामी सबैकाे संसारन्यूज

काठमाडौं । आफ्नै पार्टीभित्रकी एक युवतीलाई अश्लिल म्यासेज पठाएको आरोपमा माओवादी केन्द्रका केन्द्रीय सदस्य बद्री बजगाईँ निलम्बनमा परेका छन् ।

पार्टीको भातृ संगठन अखिल क्रान्तिकारीको काठमाडौं जिल्ला कमिटीमा आवद्ध रहेकी एक किशोरीले बजगाईविरुद्ध सामाजिक संजालमा अश्लिल म्यासेज पठाएर यौन दुव्र्यवहार गरेको आरोपसहित पार्टीका बिभिन्न समितिमा उजुरी दिएपछि बजगाई निलम्बित भएका हुन् ।

माओवादी केन्द्रको पुस ३ मा बसेको पदाधिकारीको बैठकले बजगाईँलाई केन्द्रीय समितिबाट निलम्बन गर्दै छानबिनको जिम्मा केन्द्रीय अनुशासन आयोगलाई दिएको छ ।

‘पार्टीका केन्द्रीय सदस्य बद्री बजगाईँको विषयमा पार्टीकै भातृ संगठन अनेरास्ववीयू (क्रान्तिकारी) मा कार्यरत एकजना महिला कमरेडको निवेदन र सामाजिक संजाल फेसबुकबाट पठाइएका अश्लिल म्यासेजहरुको प्रतिलिपीसहित बाग्मती प्रदेश कार्यालयको सिफारिसका आधारमा निज बद्री प्रसाद बजगाईँलाई आजकै मितिबाट लागू हुने गरी केन्द्रीय समितिबाट निलम्बन गरिएको छ । तत् सम्बन्धमा सत्य तथ्य बुझी आवस्यक छानविन गरी लिखित प्रतिवेदन १० दिनभित्र पेश गर्ने जिम्मेवारी अनुशासन आयोगलाई दिइएको छ ।’ पार्टीको पदाधिकारी बैठकको निर्णयमा भनिएको छ ।