Sansar News
काठमाडाैं । नेकपा माओवादी केन्द्र संसदीय दलको नेतामा पुष्पकमल दाहाल प्रचण्ड सर्वसम्मत चयन भएका छन् । सिंहदरबारस्थित दलको कार्यालयमा बिहीबार बसेको संसदीय दलको बैठकले अध्यक्ष प्रचण्डलाई प्रतिनिधिसभा तथा संघीय संसदीय दल नेतामा सर्वसम्मत रुपमा चयन गर्ने निर्णय गरेको हो ।
संसदीय दलकाे बैठकले प्रमुख सचेतकमा हितराज पाण्डेलाई सर्वसम्मत चयन गरिएको छ ।
तर, दलको उपनेता र सचेतक भने चयन गरेकाे छैन । सरकार गठन भएपछि सचेतक र उपेनताको टुंगो लगाउने बताइएको छ ।
त्यस्तै, वरिष्ठ उपाध्यक्ष नारायणकाजी श्रेष्ठ राष्ट्रिय सभा दल नेतामा सर्वसम्मत रुपमा चयन भएका छन् । राष्ट्रिय सभामा प्रमुख सचेतक गोपीबहादुर सार्की अछामी र सचेतक गंगाकुमारी बेल्वासे पहिलेदेखि नै छन् ।
बैठकले दलको अन्तरिम विधान पारित गरेको र अर्को व्यवस्था नभएसम्म त्यही विधानअनुसार अगाडि बढ्ने निर्णयसमेत गरेकाे छ ।
वि.सं.२०७९ पुस ७ बिहीवार १७:३५ मा प्रकाशित
