हामी सबैकाे संसारन्यूज

काठमाडौं । छिमेकी देशमा भयावह रुपमा फैलिएको कोरोना संक्रमण तथा भारतमा पनि नयाँ भेरियन्ट देखिन थालेपछि स्वास्थ्य मन्त्रालयले सजगता अपनाउन अनुरोध गरेको छ ।

मन्त्रालयले कोरोना भाइरसको संक्रमण फरक स्वरुपमा देखिएकाले यसबाट बच्न मास्क अनिवार्य लगाउन अनुरोध गरेको छ ।

मन्त्रालयले शुक्रबार बिहान एक विज्ञप्ति जारी गर्दै मन्त्रालयका सहप्रवक्ता डा. समिरकुमार अधिकारीले भनेका छन् ‘मास्क प्रयोग गर्नु हुन, एक अर्कामा भौतिक रूपमा दूरी कायम राख्नु हुन र व्यक्तिगत सरसफाइमा ध्यान दिनु हुन हार्दिक अनुरोध गर्दछौं ।’

पछिल्ला दिनमा केही देशहरुमा संक्रमणका नयाँ भेरियन्ट पुष्टि हुनुका साथै फैलिँदै गएकाले मन्त्रालयले यसमा निगरानी बढाउने तथा सम्बन्धित देशहरुसँग समन्वय गर्ने कार्य गरिरहेको मन्त्रालयले उक्त विज्ञप्तिमा जनाएको छ ।

मन्त्रालयले छिमेकी मुलुकमा देखिएको बिएफ ७ भने नेपालमा पुष्टि नभएको जानकारी दिँदै नेपाल प्रवेशका सम्पूर्ण नाकाहरुमा रहेको हेल्थ डेस्क तथा स्वास्थ्य संस्थाहरुले आवस्यक स्क्रिनिङ निगरानी, सर्तकता एवंम् आवस्यक तयारी अवस्थामा रहन समेत अनुरोध गरेको छ ।